الیکشن توں پہلاں میڈیا گروپس وی پارٹیاں دی حمایت وچ ونڈے گئے

الیکشن توں پہلاں میڈیا گروپس وی پارٹیاں دی حمایت وچ ونڈے گئے

لاہور( پاکستان پوائنٹ نیوز19۔جولائی۔2018ء ) عام انتخابات توں پہلاں میڈیا گروپس وی پارٹیاں دی حمایت وچ ونڈے گئے۔ تفصیل مطابق سابق وزیر اعظم نواز شریف نے لندن واپسی اُتے ایہ گِلہ کیتا سی کہ میڈیا چینلز جانب داری دا وکھالا کر رہے نیں پر جے پنج چھ چینل وی میرے حق وچ کھلو گئے تے صورتحال بالکل بدل جائے گی۔ ایس موقعے تے مشہور پرچا کار عاصمہ شیرازی نے وی اپنے ٹویٹر پیغام وچ آکھیا سی کہ میں نواز شریف دا لندن وچ انٹرویو کیتا سی پر میرے چینل نے اوہ انٹرویو نہیں چلایا۔

ایس بارے نواز شریف تے عاصمہ شیرازی دی ٹیلی فونک گل بات وی ساہمنے آئی سی جیہدے وچ نواز شریف ذکر کیتے گئے انٹرویو بارے پُچھ رہے سن۔ 2013دے الیکشن وچ وی کُجھ خاص میڈیا چینلز دا وکھو وکھ(مختلف) سیاسی پارٹیاں ول جُھکا واضح سی۔ تے ہن وی جدوں عام انتخابات وچ کُجھ دن باقی رہے گئے نیں تے صورتحال فیر کُجھ اوہو بن رہی اے۔ ایس بارے گل بات کردے ہوئے مشہور پرچا کارمحمد مالک دا کہنا سی کہ ایہ نہیں آکھیا جا سکدا کہ میڈیا آزاد نہیں اے یاں فیر میڈیا وچ گل بات کرن دی اجازت نہیں اے۔

پر ہن کُجھ میڈیا ادارے وی سیاست دا حصہ بن گئے نیں تے اداریاں توں وی ودھ جو اداریاں دے مالک نیں اوہناں دی بہت کلیر گروپنگ ہوئی اے۔ جے کوئی میرے کولوں پُچھے کہ ڈان کس پارٹی دے سربراہ نال اے یاں میاں عامر تے میر شکیل الرحمن دا جُھکا کس پارٹی ول اے تے میں ایہ اکھاں بند کر کے دس سکنا واں کہ کیہڑا میڈیا چینل کس پارٹی نوں سپورٹ کر رہیا اے۔ محمد مالک نے ہور آکھیا کہ جس اینکر اُتے میڈیا مالک دا زور چل جائے تے اوہ اوہدے کولوں کوئی گل منوا لیندے نیں، پر جو ساڈے پاسے دے پرچاکار نیں جیہناں کول نوکریاں دے بہت سارے آپشنز ہوندے نیں اوہ کسے دے دباء وچ نہیں آؤندے۔