لاہور( پاکستان پوائنٹ نیوز17۔جولائی۔2018ء ) مسلم لیگ (ن) دا ملکی تاریخ وچ پہلی وار اینٹی رگنگ سسٹم لانچ کرن دا اعلان، امیدوار کسے وی طرحاں دی دھاندلی دے ثبوتاں دی ریکارڈنگ کر کے مرکزی سیل گھل سکن گے۔ تفصیل مطابق پاکستان مسلم لیگ (ن) دے مرکزی رہنما سینیٹر مشاہد حسین سید نے آکھیا اے کہ مسلم لیگ (ن) پاکستانی تاریخ وچ پہلی وار اینٹی رگنگ سسٹم لانچ کر رہی اے۔
ایس سسٹم دے تحت ساڈے امیدوار کسے وی طرحاں دی دھاندلی تے شکایتاں دی ریکارڈنگ مرکزی سیل نوں گھل سکن گے۔ مشاہد حسین دا کہنا سی کہ ہن تیکر جِنے وی سروے آئے نیں اوہناں وچ وی مسلم لیگ (ن) مقبولیت دے لحاظ نال پہلے نمبر اُتے اے۔ پر انتخابات وچ دھاندلی دیاں کوششاں ہو رہیاں نیں، اینٹی رگنگ سیل نوں فعال کر دتا گیا اے۔ جیہدے تحت کسے وی طرحاں دیاں شکایتاں نوں ساہمنے لیاندا جائے گا۔
چیتے رہوے کہ (ن) لیگ پہلے ای الیکشن دے حوالے نال تحفظات دا اظہار کر چکی اے۔ (ن) لیگ ولوں الزام لایا جا رہیا اے کہ اوہناں نوں ہران لئی پری پول دھاندلی کیتی جا رہی اے۔ ایس حوالے نال نواز شریف نے اعلان کیتا سی کہ جے پری پول دھاندلی دا سلسلا نہ رُکیا تے فیر مسلم لیگ (ن) انتخابات دے نتیجے نہیں منے گی۔
