لاہور( پاکستان پوائنٹ نیوز12۔جولائی۔2018ء ) سابق وزیر اعظم نواز شریف دی سرکاری ٹی وی چینل ’پی ٹی وی‘ اُتے کوریج بارے پابندی لا دتی گئی اے۔ میڈیا رپورٹ مطابق مجرم بارے کسے وی پروگرام، ٹاک شو یاں خبراں وچ گل بات نہیں کیتی جائے گی۔ سرکاری ٹی وی چینل نے نواز شریف دی کوریج بارے نویں حکمت عملی طے کر لی اے۔ پی ٹی وی دے سارے ٹی وی چینلز اُتے پابندی دا آفس آرڈر وی جاری کر دتا گیا اے۔
آفس آرڈر وچ آکھیا گیا کہ نواز شریف کیونکہ مجرم اے ایس لئی سرکاری ٹی وی چینل اُتے اوہناں نوں کوریج نہیں دتی جائے گی۔ اوہناں بارے ٹاک شوز یاں پروگرامز سنے خبراں وچ وی گل بات نہیں کیتی جا سکے گی۔ میڈیا رپورٹ مطابق پی ٹی وی نوں جاری کیتے گئے آفس آرڈر وچ ہور آکھیا گیا کہ مجرم بندے دے اشتہاراں وچ نمودار ہون والا پیڈ کانٹینٹ وی نہیں چلایا جائے گا۔
پی ٹی وی اُتے مسلم لیگ (ن) دے اوہ اشتہار، جیہناں وچ نواز شریف ساہمنے آؤندے نیں، وی سرکاری ٹی وی چینل اُتے نشر نہیں کیتے جان گے۔ نواز شریف دا سرکاری ٹی وی چینل توں پورا بلیک آؤٹ ہوئے گا۔ چیتے رہوے کہ کل نواز شریف جدوں لندن توں واپس اپڑن گے تے ایس صورتحال وچ جو وی احتجاج ہو رہیا ہوئے گا، اوہدی کوئی کوریج نہیں کیتی جائے گی، سابق وزیر اعظم نواز شریف تے اوہناں دی دھی مریم نواز دا ملک واپسی اُتے سرکاری ٹی وی چینل توں پوری طرحاں بلیک آؤٹ کیتا جائے گا جدکہ مجرم دا پیڈ تشہیری کانٹنٹ وی نہیں چلایا جائے گا۔
ایہدے اُتے گل بات کردے ھوئے تجزیہ کار عدنان عادل نے آکھیا کہ ساڈے ملک دی اک ریت بن گئی اے کہ جدوں وی کوئی بندہ حکومت وچ ہوندا اے تے سرکاری ٹی وی چینل پی ٹی وی سارا وایلا اوہدی کوریج کردا رہندا اے تے جدوں اوہ حکومتوں باہر جاندا اے تے اوہدی کوریج بند ہو جاندی اے۔نواز شریف دی جو تھوڑی بہت کوریج پی ٹی وی اُتے چل رہی سی جیہنوں ہن بند کردتا گیا اے۔ تے میرے خیال نال قانونی طور اُتے ایہ ٹھیک فیصلا اے۔
