کلر سیداں( پاکستان پوائنٹ نیوز12۔جولائی۔2018ء ) حلقے وچ ارباں رُپئے دے ترقیاتی کم کروائے مری، کہوٹہ، کوٹلی ستیاں تے کلر سیداں دی لوکائی نے ہر دور وچ میرا مان رکھیا ، اوہناں دا احسان کدی نہیں بُھلا سکدا۔ کہوٹی کلیاڑی روڈ ، برج بیاگہ روڈ، تھون پلائیں روڈ، گہل گہواٹی روڈ سنے ہور وڈے منصوبیاں اُتے کم جاری اے۔ کارکردگی دی بنیاد اُتے لوکائی ووٹ دین گے۔
عمران خان کول پاکستان دی ترقی لئی کوئی ویژن نہیں۔ ناچ گانے دی سیاست کرن والیاں نوں لوکائی ووٹ دی پرچی نال رد کر دیوے گی۔ ایہناں خیالاں دا اظہار سابق وزیر اعظم شاہد خاقان عباسی نے اے پی پی نال اُچیچی گل بات دوران کیتا۔ شاہد خاقان عباسی دا کہنا سی کہ نواز شریف دلاں دے وزیر اعظم نیں۔ میاں نواز شریف نے ہمیشہ ملکی مفاد دی سیاست کیتی۔ انسان کولوں سیاست دوران غلطیاں ہوندیاں رہندیاں نیں۔ اوہناں دا کہنا سی کہ وزارت عظمی دوران لوکائی نوں ٹائم نہ دین اُتے معذرت خواہ آں۔ حلقہ این اے 57مسلم لیگ (ن) دا گڑھ اے۔
