اسلام آباد( پاکستان پوائنٹ نیوز11۔جولائی۔2018ء ) چیف جسٹس پاکستان جسٹس ثاقب نثار نے سرکاری گھراں اُتے غیر قانونی قبضہ کرن والیاں نوں چھیتی گھر خالی کرن دا حکم جاری کر دے ہوئے آکھیاکہ سرکاری گھر خالی کر دیو نہیں تے رینجرز توں گھر خالی کراواں گے۔ چیف جسٹس ثاقب نثار دی سربراہی وچ بنچ نے سرکاری گھراں دی غیر قانونی الاٹمنٹ بارے آپ نوٹس کیس سنوائی کیتی۔
ایڈیشنل اٹارنی جنرل نے عدالت نوں دسیا کہ پولیس نے 35کروڑ رُپئے دینے نیں۔پولیس ولوں دتے جان والے پیسے ڈیم فنڈز وچ جمع کروائے جان گے۔ ایس موقعے تے جسٹس اعجاز الاحسن نے آکھیا کہ سرکاری گھراں دی الاٹمنٹ میرٹ دی بنیاد اُتے ہونی چاہیدی۔ سنوائی دوران چیف جسٹس ثاقب نثار نے ریمارکس دتے کہ غیر قانونی قبضے کرن والیاں کولوں چھیتی گھر خالی کراؤ، پولیس اہلکار غیر قانونی رِہ رہے نیں۔ اوہناں نے آکھیا کہ پولیس نے گھر خالی نہ کیتے تے رینجرز نوں مدد لئی سداں گے۔
