لاہور( پاکستان پوائنٹ نیوز11۔جولائی۔2018ء ) لاہور وچ (ن) لیگ دی کارنر میٹنگ وچ دُکھ بھریا واقعہ ساہمنے آیا اے۔ سابق وفاقی وزیر ریلوے خواجا سعد رفیق دی کارنر میٹنگ وچ فائرنگ دے نتیجے وچ 9ورھیاں دا بال ہلاک ہو گیا۔ تفصیل مطابق الیکشن 2018وچ کُجھ دن ای باقی رہ گئے نیں۔ تے ساریاں پارٹیاں انتخابی مہم وی چلا رہیاں نیں۔ پر ایس حوالے نال اک دُکھ بھریا واقعہ ساہمنے آیا اے۔
قومی اخبار دی اک رپورٹ مطابق لاہور دے صوبائی حلقے پی پی 168توں مسلم لیگ (ن) دے امیدوار خواجا سعد رفیق دی انتخابی مہم دے سلسلے وچ کارنر میٹنگ دا اہتمام کیتا گیا سی۔ خواجا سعد رفیق دی آمد توں پہلاں ای اک مقامی رہنما اسلم بھٹو دے گن مین نے اسلحے دی نمائش کردے ہوئے ہوائی فائرنگ کر دتی۔ ایس ایس پی انویسٹی گیشن اویس ملک مطابق اک گن مین ہتھوں بندوق تِلکن تے گولیاں سِدھیاں چلن دے نتیجے وچ 9ورھیاں دا بال ہلاک ہو گیا۔ فائرنگ دے نتیجے وچ 9ورھیاں دا مظر ہلاک ہو گیا جدکہ 12ورھیاں دا فہد منظور زخمی ہو گیا۔ بعدوں پولیس نے کارروائی کردے ہوئے مرکزی ملزم رمضان عرف بلا نوں دو ساتھیاں شبیر تے بلال سنے گرفتار کر کے اسلحہ برآمد کر لیا۔
