تعلیمی اداریاں وچ گرمیاں دیاں چھٹیاں ودھا دتیاں گئیاں

تعلیمی اداریاں وچ گرمیاں دیاں چھٹیاں ودھا دتیاں گئیاں

کراچی( پاکستان پوائنٹ نیوز10۔جولائی۔2018ء ) تعلیمی اداریاں وچ گرمیاں دیاں چھٹیاں ودھا دتیاں گئیاں ۔ گرمیاں دیاں چھٹیاں 18جولائی دی بجائے 31جولائی تیکر ہون گیاں۔ محکمہ تعلیم سندھ نے چھٹیاں وچ وادھے دا نوٹی فکیشن وی جاری کر دتا اے۔ تفصیل مطابق الیکشن وچ کُجھ دن ای باقی نیں تے ایس صورتحال وچ سیاسی جماعتاں ولوں بھرپور تیاری کیتی جا رہی اے۔

پر ایہدے نال نال الیکشن دوران ذمے واریاں نبھان لئی سرکاری اداریاں نے وی الیکشن دی تیاری جاری رکھی ہوئی اے۔ ایس حوالے نال سندھ دے پڑھیار تے پڑھیاراں لئی وڈی خشخبری ایہ اے کہ سندھ حکومت نے گرمیاں دیاں چھٹیاں وچ وادھا کر دتا اے۔ عام انتخابات دی وجہ توں چھٹیاں وچ 31جولائی تیکر وادھا کیتا گیا اے۔ محکمہ تعلیم سندھ دا موقف اے کہ اُستاد الیکشن دوران پولنگ سٹیشناں اندر فرض نبھان وچ رُجھے (مصروف) ہون گے تے کئی تعلیمی اداریاں وچ پولنگ سٹیشن وی قائم ہون گے۔

ایس لئی تعلیم اداریاں اندر تعلیمی ماحول نوں جاری رکھنا ممکن نہیں اے۔چیتے رہوے کہ صوبائی محکمہ سکولز ایجوکیشن سندھ نے گرمیاں دیاں چھٹیاں 31جولائی تیکر ودھان دی سمری نگران وزیر تعلیم و صحت سعدیہ رضوی نوں گھلی سی۔دوجے پاسے چھٹیاں وچ وادھے مگروں گرمیاں دیاں چھٹیاں دا دورانیہ دو مہینے توں ودھ کے ڈھائی مہینے ہو جائے گا۔