لاہور( پاکستان پوائنٹ نیوز05۔جولائی۔2018ء ) پاکستان تحریک انصاف نے الیکشن تیکر کرپٹ سیاستداناں نوں گرفتار نہ کرن دے نیب ولوں کیتے گئے فیصلے نوں رد کر دتا اے۔ ترجمان پی ٹی آئی فواد چودھری نے آکھیا کہ نیب نوں سیاستداناں لئی دُہرا معیار نہیں رکھنا چاہیدا۔ نیب توں مطالبہ اے کہ کرپشن وچ ملوث اشفاق پرویز کیانی دے بھرا تے افتخار چودھری نوں گرفتار کیتا جائے۔
اوہناں نے لاہور ہائی کورٹ دے باہر میڈیا نال گل بات کردے ہوئے آکھیا کہ نیب صرف سیاستداناں خلاف کارروائیاں لئی بنیا ہویا اے۔نیب ولوں الیکشن تیکر گرفتاریاں روکن دی مذمت کردے آں۔ اوہناں نے مطالبہ کیتا کہ نیب صرف سیاستداناں لئی نہیں بنایا گیا۔ نیب نوں چاہیدا کہ اوہ سابق چیف جسٹس افتخار چودھری تے جنرل (ر) اشفاق پرویز کیانی دے بھرا نوں گرفتار کرے۔
اوہناں نے اک سوال اُتے آکھیا کہ قانون امیر تے غریب لئی اک ہونا چاہیدا۔ انج نہیں ہو سکدا کہ اک بندے نوں اُڈیکیا جائے تے فیصلا نہ سُنایا جائے۔ احتساب عدالت نوں چاہیدا کہ نواز شریف خلاف ایون فیلڈ ریفرنس دا فیصلا سُنائے۔ نواز شریف تے چاہندے نیں کہ فیصلا لیٹ ہو جائے۔ اوہناں نے واضح کیتا کہ فیصلا سیاسی انداز نال نہیں بلکہ قانون دے عین مطابق ہونا چاہیدا۔
