اسلام آباد( پاکستان پوائنٹ نیوز03۔جولائی۔2018ء ) مسلم لیگ (ن) دے موڈھی رہنما نے تحریک انصاف وچ رلتی ہون دا اعلان کر دتا اے۔ تفصیل مطابق مسلم لیگ (ن) دے موڈھی(بانی) رہنما ظفر علی شاہ نے تحریک انصاف دے رہنما اسد عمر نال ملاقات کیتی اے۔ ملاقات اسلام آباد وچ ہوئی۔ ایس دوران ظفر علی شاہ نے اسد عمر نوں تحریک انصاف وچ رلتی ہون بارے دسیا۔ ظفر علی شاہ ہن تحریک انصاف دے سربراہ عمران خان نال ملاقات کر کے اپنی رلت دا اعلان کرن گے۔
چیتے رہوے کہ ظفر علی شاہ لمے چِر توں قیادت نال ناراض سن۔اوہ ٹی وی شوز وچ لمے چر توں رلت کردے ہوئے اپنی جماعت (ن) لیگ دی قیادت دے فیصلیاں نوں ڈاڈھی تنقید دا نشانہ بناندے رہے ۔ہن اوہناں نے آخیر اپنی پارٹی نوں چھڈ کے عمران خان دا ساتھ دین دا فیصلا کیتا اے۔ (ن) لیگ دے سینئر رہنما و سابق سینیٹر ظفر علی شاہ دی تحریک انصاف دے سربراہ عمران خان نال 5جولائی نوں ملاقات دی آس اے۔ظفر علی شاہ دا کہنا اے کہ اوہناں دی کوشش سی کہ عمران خان نال چھیتی ملاقات ہو جائے پر تحریک انصاف دے سربراہ مصروف نیں، ایس لئی ملاقات چھیتی ممکن نہ ہو سکی۔
