بابا فرید دے مزار اُتے سجدے دا معاملا: پی ٹی آئی باغی رہنما دا بیان وی ساہمنے آ گیا

بابا فرید دے مزار اُتے سجدے دا معاملا: پی ٹی آئی باغی رہنما دا بیان وی ساہمنے آ گیا

لاہور( پاکستان پوائنٹ نیوز28۔جون2018ء ) پاکستان تحریک انصاف دے چیئرمین عمران خان تے اوہناں دی گھر والی بشری بی بی نے مشہور پنجابی شاعر بابا فرید گنج شکر دے مزار اُتے حاضری دیند ے ہوئے سجدہ کیتا تے سوشل میڈیا اُتے جنگ چھڑ گئی۔ ایس معاملے اُتے لوکاں ولوں ڈاڈھی تنقید کیتی جا رہی اے ،پر ہن تحریک انصاف دی سابقہ رہنما فوزیہ قصوری وی میدان وچ آ گئیاں۔

مائیکرو بلاگنگ ویب سائٹ ٹویٹر اُتے فوزیہ قصوری نے اک حدیث نبوی شیئر کیتی جہدے مطابق ’رسول اللہ نے فرمایاکہ تہاڈے توں پہلیاں نے قبراں نوں سجدہ گاہ بنا لیا سی، خبردار تُسیں قبراں نوں سجدہ گاہ نہ بنانا،میں تہانوں منع کرنا واں‘ایہ حدیث شیئر کردے ہوئے اوہناں نے آکھیا کہ ہمیشہ شرک توں جانو (واقف)رہنا، اللہ ساڈے ساریاں دی رہنمائی کرے۔

چیتے رہوے کہ پچھلی رات عمران خان نے اپنی بیوی بشری بی بی نال مشہور پنجابی شاعر بابا فرید دے مزار اُتے حاضری دتی۔ عمران خان دی اپنی گھر والی نال حضرت بابا فرید گنج شکر دے مزار اُتے حاضری دین دی ویڈیو سوشل میڈیا اُتے وائرل ہوئی۔ اک پاسے جتھے عمران خان دی ایس حاضری نوں چنگے انداز نال ویکھیا گیا اوتھے دوجے پاسے کُجھ ورتیندڑ (صارف) پی ٹی آئی چیئرمین عمران خان اُتے تنقید وی کر رہے نیں۔

ایس معاملے اُتے گل بات کرد ے ہوئے مشہور مذہبی سکالر ڈاکٹر راغب نعیمی دا کہنا سی کہ اسیں کسے وی مسئلے نوں کسے فرد نال نہیں بلکہ شریعت دے مسئلے نوں کسے فرد دے ناں دے بغیر ای بیان کردے آں، کیونکہ ایہ ساریاں شیواں پہلے ای درباراں تے مزاراں اُتے ہوندیاں رہیاں نیں تے آؤندے ویلے وچ ہوندیاں رہن گیاں، ایس لئی ایہنوں کسے اک بندے نال جوڑنا بہتر نہیں ہوئے گا۔

اوہناں دا کہنا سی کہ جتھوں تیکر مزار وچ داخل ہون ویلے متھا ٹیکن یاں جُھکن دی گل آؤندی اے تے ایہنوں شریعت دی زبان وچ سجدہ تعظیمی آکھیا جاندا اے تے سجدہ تعظیمی زندہ انسان یاں کسے وی شے لئی ہوئے، شریعت نے ایس کم توں منع کیتا گیا اے تے ایہنوں حرام قرار دتا گیا اے۔ ایس حرام فعل نوں کرن والے نوں رب دی بارگاہ وچ توبہ کرنی چاہیدی۔