پاکستانیو! خش ہو جاؤ

پاکستانی کارڈاں اُتے ٹیکس معطلی توں ہور کُجھ دن فائدہ چُک سکدے نیں

پاکستانیو! خش ہو جاؤ
پاکستانی کارڈاں اُتے ٹیکس معطلی توں ہور کُجھ دن فائدہ چُک سکدے نیں

اسلام آباد( پاکستان پوائنٹ نیوز28۔جون2018ء ) موبائل فون ورتیندڑاں (صارفین)لئی خشخبری اے کہ اوہ موبائل کارڈاں اُتے ٹیکس معطلی توں ہور کُجھ دن فائدہ چُک سکدے نیں۔ رپورٹ مطابق چالو مہینے دے شروع وچ موبائل فون دے کارڈاں اُتے لائے گئے ٹیکس دی معطلی دے سپریم کورٹ دے فیصلے مگروں موبائل ورتیندڑاں نوں ریلیف ملیا سی تے ورتیندڑاں نے سپریم کورٹ دے فیصلے نوں سلاہیا سی۔

سپریم کورٹ ولوں جاری حکم نامے وچ آکھیا گیا سی کہ موبائل کارڈاں اُتے سروس چارجز ود ہولڈنگ ٹیکس تے ایکسائز ڈیوٹی نوں معطل کیتا جائے۔ چیف جسٹس نے ریمارکس دتے کہ ٹیکس دین تے نادین والے وچکار فرق واضح نہ کرنا ماڑا سلوک اے۔ آئین دے تحت امتیازی پالیسی نوں کالعدم قرار دتا جا سکدا اے۔ 100رُپئے دا کارڈ لوڈ کرن اُتے 38.64پیسے وصول کیتے جاندے نیں جو غیر قانونی نیں۔

سپریم کورٹ نے موبائل کارڈاں اُتے سروس چارجز ود ہولڈنگ ٹیکس تے ایکسائز ڈیوٹی نوں معطل کردے ہوئے آکھیا کہ موبائل فون کارڈاں اُتے ٹیکس وصولی بارے اک جامع پالیسی بنائی جائے۔ ایس خبر مگروں خیال کیتا جا رہیا سی کہ موبائل ورتیندڑاں نوں صرف 15دناں لئی ای ریلیف دتا جائے گا پر انج نہیں ہویا۔ میڈیا وسیلیاں مطابق ایس معاملے اُتے جامع پالیس مرتب ہون تے سپریم کورٹ ولوں تاحکم ثانی موبائل ورتیندڑاں نوں ایہ ریلیف ملدا رہوے گا۔

ایس بارے ایہ وی آکھیا جا رہیا اے کہ سپریم کورٹ دے اگلے حکم وچ موبائل فون کارڈاں اُتے لائے ٹیکس نوں معطل جدکہ کُجھ ٹیکس نوں لاگو کیتا جائیگا، پر اجے ایس بارے کُجھ کہنا ویلے توں پہلاں ہوئے گا۔ سپریم کورٹ آف پاکستان وچ ایس کیس دی سنوائی اگلے ہفتے ہوئے گی جیہدے مگروں موبائل کارڈاں اُتے لائے ٹیکساں بارے دوجا حکم جاری کیتا جائے گا۔ ایتھے ایہ گل ذکر جوگ اے کہ عید توں پہلاں ای سپریم کورٹ نے موبائل کارڈاں اُتے لائے سارے ٹیکساں دا خاتمہ کر دتا سی جیہدے مگروں اودوں توں ہن تیکر موبائل ورتیندڑاں نوں 100رُپئے دا موبائل کارڈ لوڈ کرن اُتے پورے 100رُپئے دا ای بیلنس مل رہیا اے۔