ٹھٹہ( پاکستان پوائنٹ نیوز28۔جون2018ء ) الیکشن 2018لئی سیاسی جماعتاں ولوں تیاری جاری اے۔ایس حوالے نال کئی سیاسی جماعتاں ولوں انتخابی مہم وی تیز کر دتی گئی اے جدکہ انتخابی امیدواراں نے اپنے اپنے حلقیاں وچ جا کے لوکائی نال ملنا جُلنا وی شروع کر دتا اے۔ پر ہن لوک وی سیانے ہو گئے نیں۔تے اوہ اپنے سیاسی رہنماواں توں ایہ سوال کرنے لگ گئے نیں کہ پنج سال ساڈا خیال نہیں آیا ہن ووٹ منگن کیوں آئے او۔
انتخابی امیدواراں ولوں ٹی وی چینلز اُتے آکے اک وار فیر لوکائی نوں آکھیا جا رہیا اے کہ تُسیں سانوں ووٹ دیو۔ اقتدار وچ آن دی صورت وچ اوہ لوکائی نال کیتے گئے سارے وعدے پورے کرن گے۔ قومی اخبار دی اک رپورٹ وچ گرینڈ ڈیموکریٹک دے امیدوار شاہنواز کولوں جدوں اوہناں دی تعلیمی قابلیت بارے پُچھیا گیا تے اوہناں ولوں اک انوکھا بیان ساہمنے آیا۔
جی ڈی اے دے امیدوار شاہنواز دا کہنا سی کہ اوہناں دی تعلیم بی اے جدکہ اوہ گریجوکیشن کررہے نیں۔ شاہنواز پی پی 77توں صوبائی اسمبلی دے امیدوار نیں۔ سندھ ٹی وی نال گل بات کردے ہوئے اوہناں نے ایہ وی آکھیا کہ اوہ تعلیم عام کرن دے خاہش مند نیں۔ جدکہ سوشل میڈیا اُتے ایہ خبر آن مگروں سوشل میڈیا ورتیندڑاں نے وی ایہدے اُتے دلچسپ قسم دے تبصرے کیتے نیں۔ کئی ورتیندڑاں(صارفین) نے ایہدے اُتے حیرت دا اظہار وی کیتا اے کہ اک ایس طرحاں دا بندہ جو تعلیم بارے نہیں جاندا پر اوہ الیکشن لڑن لئی اہل کیویں ہو سکدا اے؟
