راولپنڈی( پاکستان پوائنٹ نیوز27۔جون2018ء ) سابق وزیر اعظم شاہد خاقان عباسی نوں زندگی بھر لئی نااہل قرار دے دتا گیا ، این اے 57دے ایپلٹ ٹربیونل ولوں سنائے گئے فیصلے دیاں تفصیلاں جاری کر دتیاں گئیاں نیں۔ تفصیل مطابق الیکشن ایپلٹ ٹربیونل نے سابق وزیراعظم شاہد خاقان عباسی دے این اے 57مری توں کاغذات نامزدگی رد کر دتے۔ راولپنڈی دے الیکشن ایپلٹ ٹربیونل دے جج جسٹس عباد الرحمان لودھی نے پی ٹی آئی کارکن مسعود احمد عباسی ولوں شاہد خاقان عباسی دے کاغذات نامزدگی دی منظوری خلاف دائر اپیل اُتے سنوائی کر کے دو دن پہلاں فیصلا محفوظ کیتا سی۔
اعتراض کنندہ دا کہنا سی کہ شاہد خاقان عباسی نے ریٹرننگ افسر نوں دتے گئے ریکارڈ وچ ٹیمپرنگ کیتی تے جائیداد دیاں ٹھیک تفصیلاں نہیں دتیاں۔ اعتراض کرن والے مطابق شاہد خاقان عباسی نی لارنس کالج دے جنگل اُتے قبضہ کیتا ہویا اے، اوہناں دے کاغذات اندر ایف سیون ٹو وچ مکان دی ملکیت وی کاغذات نامزدگی وچ گھٹ لکھی گئی اے۔ کاغذات نامزدگی وچ پہلے 100رُپئے والا سٹامپ پیپر لایا گیا پر بعدوں 500رُپئے والا پیپر لایا گیااے۔ الیکشن ایپلٹ ٹربیونل نے درخاست گزار دے سارے اعتراض قبول کردے ہوئے سابق وزیر اعظم دے کاغذات نامزدگی رد کر دتے۔ چیتے رہوے کہ شاہد خاقان عباسی اسلام آباد توں قومی اسمبلی دے حلقہ این اے 57توں وی (ن) لیگ دے امیدوار نیں۔
