کراچی( پاکستان پوائنٹ نیوز27۔جون2018ء ) سابق وزیر اعلا سندھ مراد علی شاہ نوں حلقے وچ جان اُتے شرمندگی دا ساہمنا،تُسیں ساڈے لئی کُجھ نہیں کیتا،حلقے دی لوکائی دا مراد علی شاہ توں شکوہ۔تفصیل مطابق جیویں جیویں الیکشن دا ویلا نیڑے آ رہیا ، اوویں اوویں سیاسی رہنماواں نے وی الیکشن وچ جِت لئی اپنیاں کوششاں تیز کر دتیاں نیں۔ پنج سال حلقے دا مونہ نہ ویکھن والے سیاسی رہنماواں نے وی ہن اپنے حلقیاں وچ آنا جانا شروع کر دتا اے۔
پر لوک وی ہن سیانے ہو گئے نیں، اوہ اپنے سیاسی رہنماواں توں ایہ سوال کرن لگے گئے نیں کہ پنج سال ساڈا خیال نہیں آیا ہن ووٹ منگن کیوں آئے او؟اجیہا واقعہ سابق وزیر اعلا سندھ مراد علی شاہ نال وی پیش آیا، جیہناں نوں اوس ویلے شرمندگی دا ساہمنا کرنا پیا جدوں ووٹراں نے اوہناں نوں آکھیا کہ تُسیں ساڈے لئی کُجھ نہیں کیتا۔ جیہدے مگروں سابق وزیر اعلا سندھ مراد علی شاہ نوں ووٹراں کولوں اپنی جان چھڈوانا مشکل ہو گیا۔
میڈیا رپورٹ مطابق سیہون دے حلقہ پی ایس 90وچ سابق وزیر اعلا سندھ مراد علی شاہ نوں انتخابی مہم دوران اوہناں دی رہائش گاہ واہڑ توں نکلدے ای اوہناں دے ووٹراں نے گھیر لیا۔ تے ایس دوران اک ووٹر نے مراد علی شاہ توں شکوہ کیتا کہ میرے والد پیپلز پارٹی دے کارکن نیں پر تُسیں اوہناں لئی کُجھ نہیں کیتا۔ ووٹر نوں جواب دیندے ہوئے مراد علی شاہ دا کہنا سی کہ مینوں وی سنو گے یاں نہیں؟ووٹر دے نہ منن اُتے مراد علی شاہ اوتھوں چلے گئے۔
ایس دوران اک بندہ واقعے دی ویڈیو بناندا رہیا جیہنوں سابق وزیر اعلا سندھ نے منع کیتا تے اوہدے منع نہ ہون اُتے اوہناں نے کیمرے اُتے ہتھ مار دتا۔ چیتے رہوے کہ ایس توں پہلاں پچھلے دیہاڑے پنوں عاقل وچ نوجوان نے خورشید شاہ دے خطاب دوران سوال کردے ہوئے آکھیا سی کہ تُسیں دس سال حکومت وچ رہے پر ساڈے علاقے وچ نہ پانی اے تے نہ ای کوئی سڑک بنی ہوئی اے۔
خورشید شاہ نے نوجوان دی گل دا جواب ہسدے ہوئے دتا تے آکھیا کہ ہن ایہ ویڈیو سوشل میڈیا اُتے پا دینا۔ کیونکہ ایس توں پہلاں کئی ایس طرحاں دے واقعات ساہمنے آئے نیں جدوں سیاسی رہنما اپنے حلقے وچ ووٹ منگن گیا تے اوہنوں ڈاڈھی شرمندگی دا ساہمنا کرنا پیا کیونکہ لوکاں نے اوہناں نوں گھیر کے پنج سال دی کارکردگی بارے سوال پُچھے۔ ایس توں پہلاں سابق وزیراعظم شاہد خاقان عباسی نوں وی کہوٹہ وچ لوکاں نے گھیر لیا سی تے پنج سال دی کارکردگی دا حساب منگیا ۔ جدکہ سکندر بوسن نوں وی ملتان وچ ایسے طرحاں دی صورتحال دا ساہمنا کرنا پیا۔
