اسلام آباد( پاکستان پوائنٹ نیوز25۔جون2018ء ) برطانیہ ولوں شریف خاندان خلاف جے آئی ٹی دیاں تحقیقات وچ تعاون نہ کرن دا انکشاف ہویا اے۔ برطانوی اخبار ڈیلی میل نے شریف خاندان دے لندن فلیٹس سنے برطانیہ وچ ہور جائیداداں تے پاناما لیکس بارے عدالتی کارروائی دیاں تفصیلاں چھاپیاں نیں۔ ڈیلی میل دی رپورٹ مطابق برطانوی حکومت کالے دھن دی آمد تے منی لانڈرنگ دے حل لئی ٹھوس اقدامات تے ہور ملکاں دیاں تحقیقات وچ پورے تعاون دے دعوے کردی اے پر حقیقت ایہدے اُلٹ وکھالی دیندی اے۔
برطانوی حکومت نے شریف خاندان خلاف پاناما لیکس دیاں تحقیقات دوران تعاون تے دور دی گل کوئی وی معلومات دین توں انکار کر دتا۔ شریف خاندان خلاف تحقیقات کرن والے خفیہ ادارے دے اک افسر نے ڈیلی میل نوں دسیا کہ برطانیہ نے معلومات فراہم کرن توں انکار کر کے تحقیقات وچ رکاوٹ پائی، بنک راہیں برطانیہ توں پاکستان پیسے گھلے گئے سن، اسیں شریف خاندان دے برطانوی اکاؤنٹس دے ریکارڈ تیکر اپڑائی(رسائی) منگی پر سانوں انکار کر دتا گیا۔
کیس اُتے کم کرن والے دوجے افسر نے دسیا کہ اسیں سکاٹ لینڈ یادڑد توں اپڑائی منگی تے اوہناں نے حامی بھر لی، پر جدوں معلومات دے وٹاندرے دا ویلا آیا تے منع کر دتا گیا، ایتھوں تیکر کہ جدوں جے آئی ٹی ارکان نے لندن تے برٹش ورجن آئی لینڈز جا کے آپ تفتیش کرن دا فیصلا کیتا تے برطانوی سفارت خانے نے اوہناں نوں ویزا دین وچ بہت دیر کردے ہوئے کئی ہفتے لا دتے۔ پاکستانی افسر نے آکھیا کہ ممکنہ طور اُتے اوہدی سیاسی وجہ ہو سکدی اے کیونکہ اوس ویلے مسلم لیگ (ن) دی حکومت سی تے برطانوی حکومت پاکستان نال اپنے تعلقات خراب نہیں کرنا چاہندی سی۔
