ٹکٹ نہ ملن اُتے پی ٹی آئی رہنما پیپلز پارٹی وچ رلتی ہو گیا

ٹکٹ نہ ملن اُتے پی ٹی آئی رہنما پیپلز پارٹی وچ رلتی ہو گیا

پشاور( پاکستان پوائنٹ نیوز23۔جون2018ء ) پی ٹی آئی دے پشاور توں تعلق رکھن والے رہنما عرفان اللہ خوانزادہ نے پارٹی ٹکٹ نہ ملن اُتے پاکستان پیپلز پارٹی وچ رلتی ہون دا اعلان کر دتا ۔ میڈیا رپورٹس مطابق پی ٹی آئی پشاور دے سینئر نائب صدر عرفان اللہ خوانزادہ نے پارٹی ٹکٹ نہ ملن اُتے نہ صرف پارٹی نوں چھڈیا بلکہ پاکستان پیپلز پارٹی وچ رلتی ہوگئے۔

عرفان اللہ نے پیپلز پارٹی وچ رلت دا باقاعدہ اعلان وی کر دتا اے۔ عرفان اللہ خوانزادہ نوں پاکستان پیپلز پارٹی نے پی پی 31توں ٹکٹ دین دی یقین دہانی وی کروا دتی اے۔ عرفان اللہ خانزادہ دی پارٹی وچ رلت اُتے پی پی پی دے رہنما ضیااللہ آفریدی این نے اے 31توں دستبرداری دا اعلان وی کر دتا اے۔ ایس توں پہلاں حلقہ پی پی 183توں پی ٹی آئی رہنما چودھری رضوان نے ٹکٹاں دی غلط ونڈ خلاف درجناں کارکناں سنے استعفا دے دتا ۔

چودھری محمد رضوان نے اک ملاقات وچ دسیا کہ پی پی پی 183وچ پی ٹی آئی بہت مضبوط سی ، ورکراں نوں بہت محنت کر کے پی ٹی آئی وچ شامل کیتا پر پارٹی نے اپنے وژن توں ہٹ کے غیر سیاسی مالداار بندے مہر جاوید نوں ٹکٹ دے دتا، جیہدے کول دولت تے ہے پر ووٹ نہیں۔ اوہناں دا کہنا سی کہ کُجھ مہینے پہلاں مہر جاوید نے پارٹی جوائن کیتی تے ہن ٹکٹ وی لے لی اے۔ چودھری رضوان نے ہور آکھیا کہ پارٹی دا یوٹرن الیکشن وچ اوہنوں ڈبو دیوے گا۔

اوہناں نے آکھیا کہ آؤندے الیکشن وچ پی ٹی آئی دی بجائے آزاد امیدوار دی حمایت کراں گے۔دوجے پاسے ناقداں تے رُس جان والے کارکناں دا کہنا اے کہ پی ٹی آئی نے اپنے اہم تے موڈھی رہنماواں نوں نظر انداز کر کے نویں پارٹی وچ رلتی ہون والے سیاسی رہنماواں نوں ٹکٹ جاری کیتے جو پارٹی دے نظریاتی رہنماواں نال زیادتی اے۔ چیتے رہوے کہ ٹکٹاں دی ونڈ بارے پی ٹی آئی نوں اوکڑاں(مشکلات) دا ساہمنا اے۔

جیہدے مگروں پی ٹی آئی ولوں جھیڑوے (متنازعہ) حلقیاں وچ فیر سروے کروان دا فیصلا کیتا گیا اے۔ تحریک انصاف دے کارکناں دے احتجاج دی وجہ توں متنازعہ حلقیاں وچ جاری کیتے گئے ٹکٹ رد کر دتے گئے نیں۔ تفصیل مطابق عمران خان دی رہائش گاہ بنی گالا وچ کئی دناں توں ٹکٹاں دی مبینہ غیر منصفانہ ونڈ خلاف تحریک انصاف دے کارکناں ولوں کیتا جان والا احتجاج کل ختم ہو گیا سی۔