اسلام آباد( پاکستان پوائنٹ نیوز23۔جون2018ء ) نجی ٹی چینل دے پروگرام وچ گل بات کردے ہوئے سینئر پرچا کار عامر متین نے آکھیا کہ مریم نواز نے عام انتخابات وچ حصہ لین لئی جمع کروائے گئے اپنے کاغذات نامزدگی تے بیان حلفی وچ اپنے شوہر کیپٹن (ر) صفدر بارے لکھیا اے کہ اوہ میرے اُتے انحصار کردے نیں۔ عامر متین نے آکھیا کہ برصغیر وچ گھر جوائی دا تصور تے ہے پر ایس طرحاں کوئی کاغذاں وچ نہیں لکھدا۔
مریم نواز نے اپنے کاغذات نامزدگی وچ اپنے شوہر بارے ای لکھ دتا اے کہ اوہ میرے اُتے انحصار کردے نیں۔ چیتے رہوے کہ کاغذات نامزدگی نال جمع کروائے گئے بیان حلفی وچ مریم نواز نے اپنی کروڑاں رُپئے دی جائیداد منی اے، جیہدے مگروں اوہناں دے جائیداد نہ ہون دے دعوے جھوٹھے ثابت ہوگئے نیں۔ میڈیا رپورٹ مطابق مریم نواز ولوں جمع کروائے گئے بیان حلفی وچ دسیا گیا کہ مریم نواز 1506کنال زمین دی مالک نیں۔
الیکشن کمیشن وچ جمع کروائے بیان حلفی وچ مریم نواز نے آپ اپنے دعویاں نوں جھوٹھا ثابت کیتا۔ بیان حلفی وچ دسیا گیا کہ مریم نواز دے چودھری شوگر ملز وچ 4لکھ 1ہزار شیئرز، محمد بخش ٹیکسٹائل مل وچ اوہناں دے 4لکھ 82ہزار اک سو شیئرز تے حدیبیہ پیپلز ملز وچ اوہناں دے 4لکھ 24ہزار 2سو شیئرز نیں۔ مریم نواز ایہناں سنے 5ملاں وچ شیئر ہولڈر نیں۔ایس توں وکھ دسیا گیا کہ مریم نواز نے اک کمپنی نوں 70لکھ رُپئے قرض وی دتا ہویا اے۔
2015وچ اوہناں نے چودھری شوگر ملز نوں وی 70لکھ رُپئے قرض دتا سی۔بیان حلفی وچ اوہناں نے حدیبیہ پیپلز مل سنے دو ملاں دے بند ہون بارے وی دسیا۔ مریم نواز نے دسیا کہ اوہناں نے 34لکھ 62ہزار رُپئے دی سرمایہ کاری کیتی اے، خاندان دی زیر تعمیر فلور مل وچ مریم نواز نے 34لکھ 62ہزار رُپئے دی سرمایہ کاری کیتی ہوئی اے۔مریم نواز نوں 4کروڑ، 92لکھ 77ہزار رُپئے دے تحفے ملے۔2015وچ مریم نواز کول 958کنال زمین سی، تن ورھیاں دوران مریم نواز دی زرعی زمین وچ 548کنال دا وادھا ہویا۔ مریم نواز نے تن ورھیاں وچ 64لکھ رُپئے نال غیر ملکی دورے کیتے۔ مریم نواز نے دسیا کہ اوہناں دے اثاثیاں وچ سالہوار(سالانہ) 4کروڑ رُپئے دا وادھا ہویا۔
