اسلام آباد( پاکستان پوائنٹ نیوز22۔جون2018ء ) حکام وی بجلی چوراں توں تنگ آ گئے۔ بجلی چوراں خلاف مذہبی رہنماواں توں فتوی لین بارے غور شروع کر دتا گیا۔تفصیل مطابق پاکستان نوں کئی دہاکیاں توں بجلی دے ڈاڈھے بحران دا ساہمنا کرنا پیا اے، پر سابقہ حکومت نے ایس مسئلے نوں سنجیدگی نال لیندے ہوئے ایہدے اُتے کم کیتا تے فیر اک ویلا ایہ وی آیا جدوں ایہ آکھیا گیا کہ ملک بھر توں لوڈشیڈنگ دا خاتمہ کر دتا گیا اے تے صرف ایہناں سرکلز وچ بجلی دی لوڈشیڈنگ ہوئے گی جتھے بجلی دی چوری اے۔
ایس توں وکھ وی لائن لاسز تے بجلی چوری نوں پاکستان وچ لوڈشیڈنگ دی اہم وجہ قرار دتا جا رہیا اے۔ موجودہ صورتحال وچ بجلی دی منگ تے رسد وچ پائے جان والے فرق اُتے بہتا قابو اے پر ہن وی بجلی چوراں دی وجہ توں حکام نوں ڈاڈھی پریشانی دا ساہمنا اے۔ حکام وی بجلی چوراں توں تنگ آ گئے۔ بجلی چوراں خلاف مذہبی رہنماواں توں فتوی لین بارے غور شروع کر دتا گیا۔
پارلیمان سب کمیٹی نے حکومت نوں تجویز دتی اے کہ بجلی چوری لئی مذہبی رہنماواں توں فتوی حاصل کیتا جائے۔ سینیٹر نعمان وزیر خٹک نے اجلاس دی صدارت کردے ہوئے آکھیا کہ بجلی چوری روکن لئی سانوں فتوی لین تے شہریاں نوں دسن دی ضرورت اے کہ روز دیاں کھان پین وستاں بنان لئی بجلی چوری کرنا حرام اے۔ اوہناں نے آکھیا کہ قوم نوں دسن دی ضرورت اے کہ بجلی چوری نال دنیا تے آخرت دوواں وچ ای اوہناں دا نقصان اے۔ ڈسٹری بیوشن کمپنیاں دے نمائندیاں نے سب کمیٹی نوں بریفنگ دیندے ہوئے دسیا اے تقریبن 17.8فیصد بجلی چوری ہوندی اے۔
