شہباز شریف نے زعیم قادری دی بغاوت دا نوٹس لے لیا

شہباز شریف نے زعیم قادری دی بغاوت دا نوٹس لے لیا

لاہور( پاکستان پوائنٹ نیوز22۔جون2018ء ) شہباز شریف نے لندن توں واپس آؤندے ای زعیم قادری دی بغاوت دا نوٹس لے لیا۔تفصیل مطابق شہباز شریف نے لندن توں واپس آؤندے ای زعیم قادری دی بغاوت دا نوٹس لے لیا اے۔ ایس حوالے نال اج (ن) لیگ دے سینئر رہنما خواجا سعد رفیق تے ملک احمد خان نال ملاقات وی کرن گے ۔ملاقات دوران زعیم قادری نوں منان لئی صلاح کیتی جائے گی۔

چیتے رہوے کہ پچھلے دیہاڑے مسلم لیگ (ن) دے سینئر رہنما زعیم قادری نے (ن) لیگ خلاف بغاوت دا اعلان کیتا سی۔زعیم قادری نے حمزہ شہباز شریف تے پارٹی قیادت دے رویے خلاف بغاوت کردے ہوئے آزاد حیثیت نال الیکشن لڑن دا اعلان کیتا ۔اوہناں نے مسلم لیگ (ن) دی قیادت نال ناراضگی مگروں پریس کانفرنس کرد ے ہوئے آکھیا کہ میں 8اکتوبر 1999نوں مسلم لیگ (ن) وچ اک ادنی کارکن دی حیثیت نال عملی سیاست شروع کیتی۔

اوہدی وڈی وجہ میرے خون وچ مسلم لیگ سی، ہے تے رہوے گی۔ میرے والد، تے دادے نے قائد اعظم دے آکھن اُتے ایس خطاب نوں لین توں انکار کر دتا، جو انگریز نے اوہناں نوں دتا سی، ایہ گلاں ایس لئی کر رہیا واں کہ ایہ گلاں میں کدی وی نہیں کیتیاں۔ اوہناں نے آکھیا کہ میرے والد نے ایوب خان، یحی خان، ضیاء الحق تے ذوالفقار دی سول آمریت وچ جیلاں کٹیاں۔ میں والد دے نقش قدم اُتے مسلم لیگ (ن) دے پلیٹ فارم توں سیاسی کوششاں شروع کیتیاں۔

مسلم لیگ (ن) دا ترجمان رہیا، سیکرٹری اطلاعات وی رہیا۔ جو اج عہدیاں اُتے بیٹھے نیں اوہ سانوں اودوں بے وقوف آکھدے سن، کہ تُسیں کیہڑی کندھ نال ٹکر ما ر رہے او۔ پر 2002دے الیکشن وچ محترمہ کلثوم نواز تے نواز شریف دا امیدوار سی۔ پر میری تھاں کُجھ ہور لوکاں نوں اگانہ کر دتا گیا۔اوہناں دا کہنا سی کہ 2008دے شروع وچ فون اُتے دسیا کہ تہاڈی شکل پسند نہیں ایس لئی جنرل سیکرٹری دا عہدہ چھڈ دیو۔

میں دوجا کوئی سوال نہیں کیتا۔ اوہناں نے آکھیا کہ پچھلے دس ورھیاں توں اوہ لوک جو پارٹی وچ نہیں سن ایہناں نوں وزیر بنایا گیا۔ پر اوہناں نے پارٹی دا دفاع نہیں کیتا۔ اوہناں نے آکھیا کہ میں روز پنج گھنٹے ٹی وی اُتے اپنی سیاست تے جماعت دا دفاع کیتا۔ لوکاں کولوں چنگا مندا سُنیا پر کدی ایس گل دا ذکر نہیں کیتا۔ اوہناں نے آکھیا کہ حمزہ شہباز شریف دے بوٹ پالش نہیں کر سکدا۔ میں سید آں ، اولا امام حسین آں، جان دے سکنا واں عزت نہیں دیواں گا، لاہور تہاڈی تے تہاڈے باپ دی جاگیر نہیں اے، تہانوں سیاست کر کے وکھاواں گا۔