ڈیرہ غازی خان( پاکستان پوائنٹ نیوز22۔جون2018ء ) سابق ایم این اے جمال لغاری نے ووٹر اُتے دباء پان تے معافی منگن لئی مجبور کرن دے الزاماں نوں رد کر دتا۔ سماجی رابطے دی ویب سائٹ فیس بک اُتے جمال لغاری نے اک ویڈیو پیغام جاری کیتا اے۔ اپنے پیغام وچ اوہناں دا کہنا اے کہ میرے حوالے نال اک ویڈیو پچھلے دو تن دناں توں وائرل ہوئی اے۔ پاکستان دا کوئی ایسا میڈیا چینل نہیں اے جیہنے میرے حوالے نال وائرل ہون والی ایہ ویڈیو نہ چلائی ہوئے۔
اپنے اپنے تبصریاں نال ایہ ویڈیو ہر ٹی وی چینل اُتے چلی۔ ایس ویڈیو وچ جو مُنڈا میرے کولوں بار بار سوال کر رہیا اے ، اوہنے آپ اپنا تعارف کروایا۔ تے مینوں آکھیا کہ تُسیں یقینن جاننا چاہو گے کہ میں کون آں، میرا ناں کمانڈو سیف الدین لغاری اے۔ میں اوہنوں آکھیا کہ مینوں بہت خشی ہوئی تہاڈے نال ملاقات کر کے۔ اوہنے میرے نال کئی گلاں کیتیاں۔
اج اک ٹی وی چینل اُتے اوہدا انٹرویو سُن کے پریشان ہو گیا۔ انٹرویو وچ اوس نوجوان نے آکھیا کہ مینوں جان توں مارن دیاں دھمکیاں مل رہیاں نیں، آکھیا جا رہیا اے کہ 25جولائی مگروں تہانوں ویکھاں گے۔ ایس طرحاں دے سوال کہ سرار صاحب!تُسیں کدھر سی؟کم نہیں ہوئے۔ علاقہ محروم اے۔ اسیں آئے دن ایہناں دا ساہمنا کرنے آں۔ میرا لغاری قبیلہ جیہدا میں سربراہ آں، پڑھیا لکھیا قبیلہ اے، اسیں اپنے قبائلی علاقے وچ سکول، درسگاہ تے ہسپتال بنائے۔
جے کسے نے ڈیرہ غازی خان اندر صحیح معنیاں وچ ترقی کیتی اے تے الحمد اللہ مینوں فخر اے ایہ دسدے ہوئے کہ میرے وڈیاں تے میں ایس علاقے دی پسماندگی نوں دور کرن دا جو حق بندا اے اوہ ادا کیتا اے۔چیتے رہوے کہ ڈیرہ غازی خان توں تعلق رکھن والے لغاری قبیلے دے سربراہ وسابق ایم این اے سردار جمال لغاری نوں ڈیرہ غازی خان دے علاقے رونگھن وچ اوس ویلے شرمندگی دا ساہمنا کرنا پیا سی جدوں جمال لغاری دے حلقے دے لوکاں نے اوہناں دی گڈی روک لئی تے اوہناں دے علاقے وچ آن اُتے احتجاج کیتا۔
ایس دوران اک ووٹر نے جمال لغاری توں سوال کیتا کہ تُسیں پنج سال کتھے سی؟جیہدا جمال خان لغاری کول کوئی جواب نہیں سی۔پر اج نوجوان نے میڈیا نال گل بات کردے ہوئے آکھیا کہ میرے اُتے دباء پایا جا رہیا اے کہ میں جمال لغاری توں معافی منگاں تے صرف معافی ای نہیں بلکہ اوہناں دے حق وچ ویڈیو بنا کے سوشل میڈیا اُتے وی اپ لوڈ کراں۔ نجی ٹی وی چینل نال گل بات کردے ہوئے سیف الدین نے دسیا کہ میرے اُتے دباء پایا جا رہیا اے کہ میں لغاری صاحب توں معافی منگاں تے لغاری قبیلے دے سردار دے حق وچ ویڈیو پیغام جاری کراں۔سیف الدین نے دسیا کہ مینوں سوشل میڈیا تے ہور طریقیاں نال دھماکا جا رہیا اے ،مینوں آکھیا جا رہیا اے کہ انتخابات ہو لین فیر تینوں ویکھ لواں گے۔
