لاہور( پاکستان پوائنٹ نیوز22۔جون2018ء ) مسلم لیگ (ن) وچ انتخابی ٹکٹاں دی ونڈ دا معاملا ہور پیچیدہ ہو گیا اے، نواز شریف دی گھر والی بیگم کلثوم نواز دے قریبی رشتے دار بلال یسین نے وی این اے 125توں الیکشن لڑن دا اعلان کر دتا اے۔ اوہناں نے آکھیا کہ این اے 125توں ٹکٹ دا اصل امیدوار تے حق دار آں۔ میڈیا رپورٹس مطابق قائد مسلم لیگ (ن) نواز شریف دی گھر والی بیگم کلثوم نواز دے قریبی رشتے دار بلال یاسین نے وی ٹکٹاں دی ونڈ اُتے تحفظات دا اظہار کر دتا اے۔
بلال یسین نے آکھیا کہ این اے 125توں ٹکٹ دا اصل امیدوار تے حق دار آں۔ اوہناں نے پارٹی قیادت توں منگ کیتی کہ این اے 125توں ٹکٹ دا حقدار امیدوار پرویز ملک نہیں اے۔ ایس لئی پارٹی قیادت پرویز ملک دی تھاں مینوں ٹکٹ دیوے۔ دوجے پاسے این اے 125توں مسلم لیگ (ن) دے رہنما ایاز صادق تے پرویز ملک دے کاغذات نامزدگی چیلنج کر دتے نیں۔ کاغذات نامزدگی پی ٹی آئی دے امیدوارا یاسمین راشد نے چیلنج کیتے نیں۔
چیتے رہوے کہ پچھلے دیہاڑے مسلم لیگ (ن) دے سینئر رہنما زعیم قادری نے (ن) لیگ خلاف بغاوت دا اعلان کیتا۔زعیم قادری نے حمزہ شہباز شریف تے پارٹی قیادت دے رویے خلاف بغاوت کردے ہوئے آزاد حیثیت نال الیکشن لڑن دا اعلان کیتا۔اوہناں نے مسلم لیگ (ن) دی قیادت نال ناراضگی مگروں پریس کانفرنس کرد ے ہوئے آکھیا کہ میں 8اکتوبر 1999نوں مسلم لیگ (ن) وچ اک ادنی کارکن دی حیثیت نال عملی سیاست شروع کیتی۔اوہدی وڈی وجہ میرے خون وچ مسلم لیگ سی، ہے تے رہوے گی۔ میرے والد، تے دادے نے قائد اعظم دے آکھن اُتے ایس خطاب نوں لین توں انکار کر دتا، جو انگریز نے اوہناں نوں دتا سی، ایہ گلاں ایس لئی کر رہیا واں کہ ایہ گلاں میں کدی وی نہیں کیتیاں۔
