اسلام آباد( پاکستان پوائنٹ نیوز21۔جون2018ء ) پاکستان مسلم لیگ (ن) دے ناراض رہنما چودھری نثار علی خان نے آزاد حیثیت نال الیکشن لڑن مگروں ہن آزاد امیدواراں دے ہم خیال گروپ نال رابطے شروع کردتے نیں۔ جیہدے توں ظاہر ہوندا اے کہ چودھری نثار الیکشن وچ (ن) لیگ نوں ٹف ٹائم دین والے نیں۔ میڈیا رپورٹس مطابق آزاد امیدوار عاصم نذیر نے (ن) لیگ توں راہواں وکھ کر لیاں۔
تفصیل مطابق آزاد امیدوار عاصم نذیر این اے 105توں(ن) لیگ کولوں ٹکٹ منگ رہے سن پر ٹکٹ نہ ملن دی صورت وچ اوہ (ن) لیگ توں وکھ ہو گئے تے ہن (ن) لیگ دے ناراض رہنما چودھری نثار نے اوہناں نال رابطہ کیتا اے۔چیتے رہوے کہ پاناما کیس وچ نواز شریف دی نااہلی مگروں مسلم لیگ (ن) دی سیاست دا کالا دور شروع ہویا۔ مسلم لیگ (ن) دی ساکھ اودوں خطرے وچ پئی جدوں پارٹی دے قائد نواز شریف نے عدلیہ، نیب تے پاک فوج سنے ملکی اداریاں نوں تنقید دا نشانہ بنانا شروع کیتا۔
انج دے ماحول وچ پارٹی دے سینئر رہنماواں نے وی نواز شریف توں پچھانہ ہٹن دا فیصلا کیتا۔ ایس ساری صورتحال وچ چودھری نثار علی خان پہلے تے چُپ رہے پر فیر اوہناں نے وی میڈیا کانفرنس، نیوز کانفرنس تے پرچا کاراں نال گل بات دوران پارٹی پالیسیاں دی مخالف کیتی۔ معاملا اودوں خراب ہویا جدوں نواز شریف تے چودھری نثار علی خان وچ دوریاں ودھیاں تے دوریاں دا ذمے وار مریم نواز دی پارٹی پالیسی تے نویں حکمت عملی نوں قرار دتا گیا۔
