اسلام آباد( پاکستان پوائنٹ نیوز21۔جون2018ء ) موبائل کارڈز اُتے شہریاں توں وادھو ٹیکس وصولی اُتے ایکشن لین مگروں چیف جسٹس آف پاکستان جسٹس ثاقب نثار نے پٹرولیم وستاں(مصنوعات) دیاں قیمتاں طے کرن تے ٹیکساں اُتے خفگی د ااظہار کر دتا۔ میڈیا رپورٹس مطابق سپریم کورٹ کراچی رجسٹری وچ سنوائی دوران چیف جسٹس آف پاکستان نے پٹرولیم وستاں دیاں قیمتاں طے کرن دے طریقہ کار اُتے سوال چُکے۔
سنوائی دوران اوگرا حکام نے بریفنگ دتی تے چیف جسٹس نے پٹرولیم وستاں دیاں قیمتاں طے کرن دے طریقہ کار اُتے عدم اطمینان دا اظہار کیتا۔بریفنگ وچ دسیا گیا کہ 62رُپئے فی لیٹر گیسو لین برآمد کیتی جاندی اے۔ ایہناں دیاں قیمتاں دا تعین مہینے مگروں ہوندا اے تے ایہناں قیمتاں دے تعین لئی بین الاقوامی سطح اُتے بولی لائی جاندی اے،جیہدے مگروں گھٹ بولی لان والی کمپنی توں گیسولین حاصل کیتی جاندی اے۔
عدالت نے ایس رپورٹ نوں مجموعی طور اُتے رد کر دتا۔ چیف جسٹس نے پٹرولیم وستاں دی درآمدات دے عمل اُتے شک دا اظہار کیتا۔ چیف جسٹس نے سوال کیتا کہ کیہڑے قانون تے طریقہ کار دے تحت پٹرول دی قیمت 62.8رُپئے فی لیٹر طے کیتی گئی؟ چیف جسٹس نے ریمارکس دتے کہ گھر بیٹھے بیٹھے قیمتاں ودھا دتیاں جاندیاں نیں، لوکاں نوں پاگل کر کے رکھ دتا اے۔ پرہن سارا حساب دینا پئے گا۔ چیف جسٹس نے پٹرولیم وستاں دیاں قیمتاں دے تعین تے ٹیکسز دا چھ مہینے دا ریکارڈ وی طلب کر لیا۔
