اسلام آباد( پاکستان پوائنٹ نیوز19۔جون2018ء ) عمران خان ولوں جھیڑوے (متنازعہ) حلقیاں وچ فیر سروے کروان دا فیصلا کیتا گیا اے، تحریک انصاف دے کارکناں دے احتجاج دی وجہ توں متنازعہ حلقیاں وچ جاری کیتے گئے ٹکٹ رد کر دتے گئے نیں۔ تفصیل مطابق عمران خان دی رہائش گاہ بنی گالا وچ کئی دناں توں ٹکٹاں دی مبینہ غیر منصفانہ ونڈ خلاف تحریک انصاف دے کارکناں ولوں کیتا جان والا احتجاج ہن وی جاری اے۔
ایس ساری صورتحال دی وجہ توں ہن تحریک انصاف دے سربراہ عمران خان ولوں جھیڑوے( متنازعہ) حلقیاں وچ فیر سروے کروان دا فیصلا کیتا گیا اے۔ تحریک انصاف دے کارکناں دے احتجاج دی وجہ توں جھیڑوے حلقیاں وچ جاری کیتے گئے ٹکٹ منسوخ کر دتے گئے نیں۔ ایہناں حلقیاں وچ جاری کیتے گئے ٹکٹاں اُتے نظرثانی کیتی جائے گی۔ عمران خان نے کارکناں نوں یقین دہانی کروائی اے کہ ٹکٹاں دی ونڈ دے معاملے وچ جتھے کوئی غلطی ہوئی اے، اوہنوں ٹھیک کیتا جائے گا۔دوجے پاسے بنی گالا وچ ٹکٹ نہ ملن اُتے شروع ہون والا احتجاج ہور ودھ گیااے۔ صورتحال خراب ہون اُتے رینجرز نوں سد لیا گیا اے۔ رینجرز نوں اسلام آباد دی ضلعی انتظامیہ دے آکھن اُتے تعینات کیتا جا رہیا اے۔
