ٹکٹاں د ی ونڈ:پی ٹی آئی کارکناں دا عمران خان دے گھر باہر احتجاج، فیصلا واپس لین دی منگ

اسلام آباد( پاکستان پوائنٹ نیوز09۔جون2018ء ) پاکستان تحریک انصاف دے کارکناں نے چیئرمین عمران خان دے گھر باہر احتجاج کردے ہوئے ٹکٹاں ونڈن دا فیصلا واپس لین دی منگ کیتی اے۔ ہفتے نوں بنی گالا وچ عمران خان دے گھر باہر پی ٹی آئی دے کارکناں نے احتجاج کیتا۔ ٹکٹاں ونڈن دے اعلان مگروں وکھالویاں دا کہنا اے کہ پارلیمانی بورڈ نے میرٹ اُتے ٹکٹاں نہیں دتیاں، ایس لئی ٹکٹاں ونڈن دا فیصلا واپس لیا جائے۔

راولپنڈی توں ٹکٹ توں محروم صابر راجا نے کارکناں نال احتجاج کیتا۔ صابر راجا نے چودھری نثار علی خان دے مقابلے وچ کاغذات جمع کروائے سن پر اوہناں دے مقابلے وچ غلام سرور خان نوں ٹکٹ دے دتا گیا۔ ایس توں وکھ مردان توں وی لوک احتجاج کرن آگئے۔ اجے تیکر پارٹی ولوں اوہناں نال کوئی گل بات نہیں آیا۔ چیتے رہوے کہ پی ٹی آئی نے پچھلی رات عام انتخابات لئی انتخابی امیدواراں دی لسٹ جاری کیتی۔ پی ٹی آئی ولوں خیبرپختونخوا صوبائی اسمبلی دے 81امیدوار، سندھ اسمبلی دے اجے 21حلقیاں، بلوچستان اسمبلی دے 23حلقیاں تے پنجاب دے 165حلقیاں لئی انتخابی امیدواراں نوں ٹکٹ جاری کیتا گیا۔ کئی انتخابی امیدواراں نے پارٹی ولوں ٹکٹ نہ ملن اُتے سخت ردعمل دا اظہار وی کیتا۔