لاہور( پاکستان پوائنٹ نیوز09۔جون2018ء ) بنیادی مقصد تے ترجیح الیکشن دے انعقاد نوں شفاف بنانا اے، نہ پہلے کوئی سیاسی ایجنڈا سی تے نہ ہن اے، نگران حکومتاں دی کارکردگی ویکھ کے شک دو ر ہو جان گے۔ ایہناں خیالاں دا اظہار اوہناں شاعر مشرق علامہ اقبال دے مزار اُتے حاضری دین مگروں میڈیا نال گل بات کردے ہوئے کیتا۔ حسن عسکری نے مزار اقبال اُتے فاتحہ خوانی تے پُھلاں دی چادر چڑھائی۔
ایس موقعے تے نگران وزیر اعلا نے پروہنیاں دی کتاب وچ اپنے تاثرات وی لکھے۔ میڈیا نال گل بات کردے ہوئے اوہناں دا کہنا سی کہ بنیادی مقصد تے ترجیح الیکشن دے انعقاد نوں شفاف بنانا اے۔ نہ پہلے کوئی سیاسی ایجنڈا سی تے نہ ہن اے۔ نگران حکومتاں دی کارکردگی ویکھ کے شک دو ر ہو جان گے۔ نگراں حکومتاں دا مقصد ساریاں سیاسی جماعتاں نوں اکِو جیہے موقعے دینا اے، میری کابینہ نِکی تے ٹینکو کریٹس اُتے مشتمل ہوئے گی ۔
کابینہ غیر سیاسی ہوئے گی، اک متھی مدت لئی آیا واں، میرا کوئی سیاسی ایجنڈا نہیں ۔نگران وزیر اعلا نے آکھیا کہ جدوں توں لکھنا شروع کیتا سبھ حکومتاں اُتے تنقید کیتی، میں اج توں نہیں 40ورھیاں توں اخباراں وچ لکھ رہیا واں، صوبائی حکومتاں دا کم الیکشن دے عمل وچ سہولت دینا ہوندا اے۔ نگران حکومت دی کارکردگی ویکھ کے شک دور ہو جان گے۔اوہناں دا کہنا سی کہ الیکشن وچ سہولت لئی جو تبدیلی ہوئے گی اوہی کیتی جائے گی۔
الیکشن وچ ضلعی انتظامیہ دا بہت اہم کردار ہوند ااے۔ ضلعی انتظامیہ نوں آکھاں گے کہ ساریاں سیاسی جماعتاں نوں الیکشن وچ اِکو جہیاں سہولتاں دتیاں جان۔ اک سوال دے جواب وچ پروفیسر حسن عسکری نے آکھیا کہ جدوں وی نویں حکومت آؤندی اے ،کئی تبدیلیاں کیتیاں جاندیاں نیں۔
