اسلام آباد( پاکستان پوائنٹ نیوز05۔جون2018ء ) ودھدے ہوئے ملکی قرضیاں نوں مُکھ رکھدے ہوئے پاک فوج دے سابق سپاہی نے 5ہزار رُپئے سپریم کورٹ گھل دتے۔ تفصیل مطابق پاکستان دے بیرونی تے ملکی قرضیاں وچ پچھلے 5 ورھیاں دوران بہت وادھا ہویا اے۔ پاکستان دا چالو (موجودہ) قرضہ ایس ویلے 90کھرب ڈالر توں ودھ گیا اے۔ ایس صورتحال وچ ملک دا ہر شہری لکھاں رُپئے دا مقروض ہو گیا اے۔
ایس صورتحال نے جتھے ماہرین معیشت نوں پریشان کیتا اے اوتھے ایہناں معاملات توں جانو لوکائی وی ڈاڈھی پریشان وکھالی دیند اے۔ لوکائی ولوں سوال کیتا جاندا اے کہ آخر ایہ سارے قرضہ کیویں واپس کیتا جائے گا۔ ملک نوں قرضیاں دے بھار ہیٹھ ویکھ کے ہن پاک فوج دے (ر) سپاہی محمد اسلم ولوں سپریم کورٹ نوں 5ہزار رُپئے گھلے گئے نیں۔ منڈی بہاؤ الدین توں تعلق رکھن والے نائیک محمد اسلم نے اپنی طاقت مطابق ملک دی مدد کرن دی کوشش کیتی اے۔
سپریم کورٹ نوں پیسیاں نال گھلے گئے خط وچ نائیک محمد اسلم نے موقف اختیار کیتا اے کہ پاکستان دے قرضے بہت ودھ گئے نیں۔ ایس لئی برائے مہربانی 5ہزار رُپئے قبول کرو تے ایہ پیسے پاکستانی حکومت نوں قرضیاں دی واپسی لئی دیو۔ نائیک محمد اسلم دے خط دا جواب سپریم کورٹ ولوں وی دتا گیا اے۔ جوابی خط وچ آکھیا گیا اے کہ سپاہی نائیک محمد دا ایہ کم ایس گل دا واضح ثبوت اے کہ لوک چیف جسٹس تے سپریم کورٹ اُتے کِنا بھروسہ کردے نیں۔
پر کسے قسم دی رقم وصولی دا اختیار سپریم کورٹ دے اختیار وچ نہیں اے۔ ایس لئی اوہ 5ہزار رُپئے سپاہی نائیک محمد نوں واپس گھل رہے نیں۔ دوجے پاسے سپاہی نائیک محمد دے ایس خط نے سوشل میڈیا اُتے دھم پا دتی اے۔سوشل میڈیا ورتیندڑاں نے سپاہی دے ایس کم نوں سلاہیا اے۔
