اسلام آباد( پاکستان پوائنٹ نیوز04۔جون2018ء ) حکومت نے آؤندے مالی سال لئی بھاشا تے مہمند ڈیم دی اُساری لئی بجٹ 36ارب توں ودھا کے 65ارب رُپئے کر دتا اے۔ سرکاری شعبہ دے سالانہ ترقیاتی پروگرام دے تحت آؤندے مالی سال لئی بھاشا ڈیم دی اُساری لئی 23ارب رُپئے رکھے گئے نیں جدکہ مال سال 2018-19وچ 7نویاں سکیماں سنے پانی دے ہور وسائل لئی 849ارب رُپئے رکھے گئے نیں۔
ایہناں منصوبیاں وچ نیشنل فلڈ پروٹیکشن پلان فور، دیامیر بھاشا ڈیم، سی بی آر سی فرسٹ لفٹ گھٹ گریوٹی پروجیکٹ ڈیرا اسماعیل خان، مہمند ڈیم پن بجلی منصوبہ، کے بی فیڈر اپر کینال نوں کراچی شہر نال پانی دی سپلائی لئی لنک کرنا، سکھر بیراج دی بحالی و آرائش تے منچھر جھیل توں فیڈنگ کینال دی اُساری شامل اے۔ ایس طرحاں مخصوص علاقیاں وچ منصوبیاں دی چھیتی تکمیل لئی 62ارب رُپئے ،آزا د جموں کشمیر لئی 22ارب رُپئے، گلگت بلتستان لئی 15ارب رُپئے تے فاٹا لئی 25ارب رُپئے رکھے گئے نیں۔
ایس طرحاں ہائر ایجوکیشن سنے اعلا تعلیمی پروگراماں لئی 57ارب رُپئے رکھے گئے نیں۔ ہائر ایجوکیشن دے منصوبے انٹر پرائس ریسورس پلاننگ سسٹم اک لکھ نوجواناں نوں آئی ٹی دی تربیت دینا، انجینئرنگ یونیورسٹیاں وچ لیبارٹریاں بنانا، سائبر سکیورٹی لئی سنٹر آف ایکسیلینس قائم کرنا سنے ہور منصوبے شامل نیں۔
