اسلام آباد( پاکستان پوائنٹ نیوز31۔مئی2018ء ) قومی اسمبلی دی آئینی مدت پوری ہو گئی۔ وزارت پارلیمانی امور نے قومی اسمبلی دی تحلیل دا نوٹی فکیشن جاری کر دتا۔ تفصیل مطابق پاکستان دی جمہوریت اک سُنہرے دورے وچ داخل ہو رہی اے۔ مسلم لیگ (ن) دی پنج سالہ حکومت اپنی آئینی مدت پوری کر رہی اے۔ پاکستان اپنی تاریخ وچ دوجی وار جمہوری دور نوں پورا کر رہیا اے۔
پاکستان پیپلز پارٹی دی جمہوری حکومت مگروں اج مسلم لیگ (ن) دی جمہوری حکومت وی جان نوں تیار اے۔ قومی اسمبلی دی آئینی مدت پوری ہو گئی۔ 2013دے الیکشن مگروں شروع ہون والا ایہ جمہوری دور اپنی مدت پوری کر رہیا اے۔ وزارت پارلیمانی امور نے قومی اسمبلی دی تحلیل دا نوٹی فکیشن جاری کر دتا۔ ایس آئینی مدت وچ قومی اسمبلی نے بہت سارے لاہ چڑھا ویکھے۔
ایسے اسمبلی وچ نواز شریف نوں تیجی وار چُنیا گیاتے ایسے اسمبلی وچ نواز شریف دی نااہلی مگروں شاہد خاقان عباسی نے وی ملک دی سربراہی سنبھالی۔ 2014دے دھرنے وچ ایس اسمبلی دوالے پاکستان تحریک انصاف نے دھرنا وی دتا تے فیر ایسے اسمبلی دے اجلاس وچ رلت وی کیتی۔ ایس اسمبلی وچ نیشنل ایکشن پلان، انتخابی اصلاحات سنے کئی قوانین پاس ہوئے تے ختم نبوت دی شق وچ ترمیم دے مسئلے اُتے مسلم لیگ (ن) دی حکومت نوں فیض آباد دھرنے دا وی ساہمنا کرنا پیا۔ فاٹا انضمام ایس دور دی شاندار پیش رفت رہی۔
