احتساب عدالت : لیگی رہنما نواز شریف دے ہتھ چُمدے رہے

احتساب عدالت : لیگی رہنما نواز شریف دے ہتھ چُمدے رہے

اسلام آباد( پاکستان پوائنٹ نیوز24۔مئی2018ء ) نجی ٹی وی چینل دے رپورٹر صدیقی جان دا کہنا سی کہ پچھلے دیہاڑے شریف خاندان خلاف ایون فیلڈ ریفرنس دی سنوائی ہوئی۔ سنوائی دوران عدالتی کمرے وچ دلچسپ صورتحال ویکھن نوں ملی۔اوہناں دا کہنا سی کہ سنوائی دوران پاکستان مسلم لیگ (ن) دے رہنما مشاہد حسین سید نے عدالتی کمرے وچ آؤندے ای اُچی اُچی آواز وچ نواز شریف دیاں تعریفاں شروع کر دتیاں۔

جیہدے اُتے عدالتی عملے توں مشاہد حسین سید نوں جھاڑ پئی۔ پر ایہدے مگروں وی اوہ نواز شریف دیاں تعریفاں کردے رہے۔اوہناں دا کہنا سی کہ جدوں نواز شریف روسٹرم اُتے آئے تے اوہناں نے سابق صدر جنرل پرویز مشرف اُتے الزام لانے شروع کیتے تے مشاہد حسین سید سِر ہلا کے اوہناں دے الزاماں دی تائید کردے رہے۔ ایس توں وکھ جدوں نواز شریف اپنا بیان ختم کر کے واپس آئے تے پاکستان مسلم لیگ (ن) دے رہنما جاوید لطیف نے نواز شریف دے ہتھ چُم لئے۔

جدکہ اک (ن) لیگی رہنما نے باقاعدہ رون دی اداکاری کیتی تے اوہناں دی پوری کوشش سی کہ نواز شریف ساہمنے اوہناں دے اتھرو نکل جان جدکہ مریم نواز موبائل فون اُتے رُجھیاں رہیاں پرطاہرہ اورنگزیب مریم نواز دے سِر اُتے کھلوکے قرآن پاک پڑھدیاں رہیاں۔ صدیق جان دا کہنا سی کہ کیپٹن (ر) صفدر تسبیح لے کے عدالت وچ ورد کردے رہے۔ وظیفے پڑھدے رہے تے عدالتی کمرے وچ چکر لاؤندے رہے۔ پر اوہناں نوں عدالتی کمرے وچ کسے تھاں نہ دتی۔