اسلام آباد( پاکستان پوائنٹ نیوز24۔مئی2018ء ) پاکستان تحریک انصاف دے چیئرمین عمران خان نے آکھیا اے کہ بل پاس کرنا بہت وڈا کم اے، قوم نوں مبارکباد دینا واں، فاٹا قوانین اُتے نظرثانی لئی کمیٹی بنائی جائے، فاٹا نوں صوبہ بنان دا آئیڈیا ٹھیک نہیں سی، پارلیمنٹ وچ بتھیری تلخی رہی، دھاندلی خلاف دھرنا دینا پیا، اسیں ایمپائر صرف اللہ نوں مندے آں، میرا ضمیر صاف اے کہ اسیں لوکاں دی گل کیتی اے۔
اوہناں نے قومی اسمبلی وچ فاٹا لئی آئینی ترمیم دی منظوری مگروں ایوان وچ گل بات کرد ے ہوئے آکھیا کہ فاٹا لئی بل پاس کرنا بہت وڈا کم اے۔ مبارکباد دینا واں۔ قبائلی علاقیاں دے نقصاناں دا ازالہ وی ہو سکدا اے۔ ہن ایہ پاکستان دا حصہ وی بن جان گے تے ہولی ہولی ایہناں اُتے وی قانون لاگو ہوئے گا۔ عمران خان دا کہنا سی کہ جدوں دیر تے سوات پاکستان دا حصہ بنے سن، اوتھوں لئی قانون بنا کے چھیتی نافذ کر دتے سن تے ایہدے نتیجے وچ اوتھے قتلام گھٹ ہوگیا۔
عمران خان دا کہنا سی کہ قبائلی علاقیاں وچ جدوں قانون نافذ کرنا اے تے اسیں بڑا سوچ سمجھ کے ایہ سبھ کرنا اے۔ کیونکہ اوہناں کول اجے کوئی سسٹم نہیں اے۔ دوجا فاٹا والیاں کول پُرانا بلدیاتی سسٹم اے یعنی جرگہ اوتھے آپے فیصلا کردا اے۔ سانوں اوہناں نوں وی بااختیار بنان دی ضرورت اے تاں جے اوہناں دا لوکل گورنمنٹ سسٹم فعال ہوسکے۔اوہناں نے آکھیا کہ فاٹا وچ پرانا سسٹم نہیں چل رہیا۔
پولیٹیکل سسٹم وچ کرپشن بہت سی۔ سمگلنگ سی، کرپشن عام سی۔ سانوں شروع وچ اوکڑاں پیش آن گیاں۔ کمیٹی بنائے جائی جو قوانین اُتے نظر ثانی کرے۔ اوہناں نے آکھیا کہ صوبہ بنان دا جو وی آئیڈیا دے رہیا اے اوہنوں سمجھنا چاہیدا کہ اوہ مطالبہ ٹھیک نہیں اے۔ عمران خان نے آکھیا کہ پارلیمنٹ وچ بہت تلخی رہی اے۔ میں تے میری پارٹی نے جو وی سٹینڈ لیا ساڈا کم عوامی مفاداں دا تحفظ سی۔ جدوں 22جماعتاں آکھ رہیاں سن کہ الیکشن وچ دھاندلی ہوئی اے۔ اسیں صرف چار حلقے کھولن دی منگ کر رہے ساں تے اوہدے وچ کیہڑی غلط گل سی؟جدوں اسیں سپریم کورٹ گئے، پارلیمنٹ وچ گئے ، اک سال تیکر جدوں سانوں کُجھ نہ لبھا تے اسیں دھرنا دے دتا۔
