اسلام آباد( پاکستان پوائنٹ نیوز22۔مئی2018ء ) جہانگیر ترین نے تحریک انصاف توں وکھ ہون دی آفر کر دتی اے۔ تفصیل مطابق منگل دے دیہاڑے تحریک انصاف دی کور کمیٹی دا اہم اجلاس ہویا۔ اجلاس دی صدارت تحریک انصاف دے سربراہ عمران خان نے کیتی۔ اجلاس وچ ساری سینئر قیادت نے وی رلت کیتی۔ اجلاس دوران صورتحال اوس ویلے خراب ہو گئی جدوں پارٹی رہنما شاہ محمود قریشی تے جہانگیر ترین وچکار مونہ ماری ہوئی۔
شاہ محمود قریشی نے پارٹی اجلاس دوران آکھیا کہ اک نااہل قرار دتے گئے بندے نوں پارٹی دے سی ای سی اجلاس وچ بیٹھن دی اجازت نہیں ہونی چاہیدی۔ شاہ محمود قریشی ولوں ایہ اعتراض سابق رکن و تحریک انصاف پنجاب سینٹرل دے صدر رائے حسن نواز اُتے چُکیا گیا۔ ایس موقعے تے جہانگیر ترین نے چھیتی نال شاہ محمود قریشی نوں مخاطب کردے ہوئے سوال کیتا کہ کیہ وائس چیئرمین ایہ اعتراض اوہناں اُتے چُکے رہے نیں؟ پر عمران خان نے چھیتی نال مداخلت کردے ہوئے آئندہ رائے حسن نواز نوں پارٹی عہدہ نہ دین دا اعلان کیتا۔
ایس موقعے تے جہانگیر ترین نے پارٹی چھڈن دی آفر وی کیتی۔ جہانگیر ترین دا کہنا سی کہ جے پارٹی اجے فیصلا کرے تے اوہ گھر چلے جان گے تے نہ آن والے ویلے نوں پارٹی دے کسے اجلاس وچ رلت کرن گے نہ ای ایس فیصلے وچ کوئی مداخلت کرن گے۔
