لندن(پاکستان پوائنٹ نیوز21۔مئی2018ء ) شہزادہ ہیری تے امریکی اداکارہ میگھن مارکلے دا ویاہ 19مئی ہفتے نوں ہویا۔ ویاہ دی تقریب مشہور تے تواریخی تھاں ونڈسر کاسل وچ ہوئی۔ تقریب وچ 600بندیاں نے رلت کیتی۔ ویاہ دی ایس تقریب نوں دنیا بھر دے ٹی وی چینلز نے براہ راست وکھایا۔ ونڈسرکاسل جتھے پروہنیاں نال بھریا ہویا سی اوتھے شہزادے ولیم نال اک کُرسی خالی وکھالی دتی۔
شاہی ویاہ دی ایس تقریب وچ شہزادے ولیم نال موجود اک خالی سیٹ نے سبھ دی توجہ اپنے ول کروائی تے سبھ دے ذہن وچ سوال آیا کہ ایہ خالی سیٹ کیہدی سی؟شاہی خاندان دے قریبی لوکاں تے کُجھ رپورٹراں دا کہنا اے کہ ایہ سیٹ شہزادے ہیری نے اپنی ماں شہزادی ڈیانا سپنسر دے احترام وچ خالی چھڈی سی۔ ویاہ دی تقریب وچ شہزادہ ہیری روندے ہوئے وی نظر آئے۔ شہزادہ ہیری یقینی طور اُتے اپنی ماں نوں یاد کردا ہویا رویا سی۔ دوجے پاسے سوشل میڈیا وراُتے ویاہ دی ڈاڈھی دھم مچی تے لوکاں نے ایس نویں جوڑے لئی نیک خاہشاں دا اظہار کیتا۔
