لیفٹیننٹ جنرل (ر) شاہد عزیز دے ہلاک ہون دی اطلاع

لیفٹیننٹ جنرل (ر) شاہد عزیز دی لاش پاک افغان بارڈ ر توں برآمد

لیفٹیننٹ جنرل (ر) شاہد عزیز دے ہلاک ہون دی اطلاع
لیفٹیننٹ جنرل (ر) شاہد عزیز دی لاش پاک افغان بارڈ ر توں برآمد

اسلام آباد(پاکستان پوائنٹ نیوز19۔مئی2018ء ) لیفٹیننٹ جنرل (ر) شاہد عزیز دی موت دیاں خبراں آ رہیاں نیں۔ میڈیا رپورٹ مطابق شاہد عزیز دی لاش نوں پاک افغان بارڈر توں برآمد کیتا گیا۔ شاہد عزیز لمے چِر توں لاپتا سی۔ اوہناں دے گھر والیاں نے وی اوہناں دی موت دی تصدیق کر دتی۔ شاہد عزیز چیئرمین نیب دے عہدے اُتے وی رہے۔ اوہناں نے اک کتاب ُیہ خاموشی کہاں تک، وی لکھی۔

وسیلیاں مطابق جنرل (ر) شاہد عزیز نے آکھیا سی کہ اوہناں نے جو امریکی فوج دا ساتھ دتا سی اوہدا ہن بدلا لینا چاہندے نیں۔اوہ بدلا لین لئی افغانستان وچ موجود سن جتھے اوہ کُجھ چِر پہلاں مارے گئے۔ لیفٹیننٹ جنرل (ر) شاہد عزیز 37سال تیکر پاک فوج دا حصہ رہے۔ 2005وچ پاک فوج توں (ر) ہوئے۔ اوہناں دے والد وی فوج وچ سن۔ اوہ بریگیڈیئر دے عہدے تیکر اپڑے۔

جنرل (ر) شاہد عزیز نے 1971دی جنگ وی لڑی، اوہ سیکنڈ لیفٹیننٹ توں تھری سٹار جنرل تیکر پاک فوج دے پورے کمانڈ سسٹم دا حصہ رہے۔ شاہد عزیز ڈائریکٹر جنرل ملٹری آپریشنز وی رہے تے چیف آف جنرل سٹاف وی۔ اوہناں کول لاہور دے کور کمانڈر دا عہدہ وی رہیا۔ (ر) ہون مگروں دو سال لئی چیئرمین نیب وی رہے۔ چیتے رہوے کہ کُجھ دن پہلاں سابق صدر جنرل (ر) پرویز مشرف نے آکھیا سی کہ جنرل (ر) شاہد عزیز اک غیر متوازن بندے نیں۔

مینوں پتا اے کہ اوہ بطور میجر تے کرنل کیہ کُجھ کردے رہے، اوہ میرے رشتے دار نیں۔ اوہناں بارے کسے نوں پتا نہیں کہ اوہ اج کل کتھے نیں۔ کُجھ لوک آکھ رہے نیں کہ اوہ داڑھی رکھ کے شام چلے گئے تے اوتھے لڑدے ہوئے مرگئے۔ کارگل ایشو بارے نجی ٹی وی دے اینکر ولوں کیتے گئے سوال دے جواب بارے پرویز مشرف نے آکھیا کہ شاہد عزیز دی کتاب نوں حوالے دے طور اُتے پیش نہ کرو، اوہ اک غیر متوازن بندے نیں۔ شاہد عزیز نہیں جاندے کہ آرمی سانوں رازداری سکھاؤندی اے۔