لاہور(پاکستان پوائنٹ نیوز19۔مئی2018ء ) پچھلی رات امریکی ریاست ٹیکساس دے اک سکول وچ فائرنگ دے واقعے وچ پاکستانی پڑھیارن سبیکا شیخ ہلاک ہو گئی۔ امریکی ریاست ٹیکساس دے سکول وچ فائرنگ نال ہلاک ہون والی پاکستانی پڑھیارن سبیکا عزیز دی سہیلی دی پُھپھی نے وی سبیکا دی موت اُتے دُکھ دا وکھالا(اظہار) کیتا اے۔ ٹینا نے اپنی فیس بک ڈی پی اُتے وی سبیکا دی تصویر لائی اے ۔
ٹینا نے لکھیا اے کہ سبیکا سدا ساڈے دل وچ رہوے گی۔ کُجھ دیر مگروں ٹینا نے سبیکا لئی دعاواں کردے رہن دی اپیل کردے ہوئے لکھیا کہ کُجھ ٹھیک نہیں لگ رہیا پر اسیں پرامید آں۔ سبیکا ساڈے گھر رہی سی تے ہن اوہ ساڈی فیملی وانگ سی، ساڈے خاندان دیاں ساریاں تقریباں وچ نال جاندی سی۔اوہناں نے ہور لکھیا کہ اوہ بہت چنگی طبیعت دی بہت پیاری بچی سی۔ شاید ای تُسیں ایس طرحاں دے انسان نال ملے ہوو۔
سبیکا عزیز اسیں تیرے نال بہت پیار کرنے آں تے تیری حفاظت لئی دعاگو آں۔ امریکی سوانی نے سبیکا دے گھر والیاں نال دُکھ دا وکھالا(اظہار) کیتا اے۔ اوہناں دا ہور کہنا سی کہ بیکا نے چھیتی ای اپنے گھر واپس جانا سی۔ پر اوہ ساڈے وچکار نہیں رہی میں ایہ سبھ کُجھ تصور وی نہیں کر سکدی۔چیتے رہوے کہ پچھلی رات امریکی ریاست ٹیکساس دے شہر سانتافی دے ہائی سکول وچ فائرنگ دے نتیجے وچ 10بندے ہلاک ہو گئے سن۔
