اسلام آباد(پاکستان پوائنٹ نیوز16۔مئی2018ء ) افغانستان نے اقتصادی راہداری منصوبے وچ رلتی ہون دا اعلان کر دتا، چین ولوں خیرمقدم ۔ تفصیل مطا بق منگل دے دیہاڑے وفاقی راجدھانی دے اک نجی ہوٹل وچ سیمینار نال خطاب کردے ہوئے پاکستان وچ افغانی سفیر عمر زاخیل وال نے سی پیک نوں خطے دی ترقی دا ضامن قرار دیندے ہوئے اوہدے وچ رلتی ہون دا اعلان کیتا اے ۔
اوہناں نے آکھیا کہ پاکستان، افغانستان تے چین گوانڈھی ملک نیں،سی پیک دے نتیجے وچ تِناں ملکاں وچکار خشحالی سنے بہترین تعلقات قائم ہون گے ۔ اوہناں دا کہنا سی کہ اقتصادی تعاون نال افغانستان وچ پائیدار امن ہوئے گا تے افغانستان وچ امن دے قیام دا واحد راہ مفاہمتی عمل اے۔ دوجے پاسے پاکستان وچ چینی سفیر ژاوجنگ نے افغانستان نوں سی پیک دا حصہ بنن اُتے جی آیاں آکھیا۔
چیتے رہوے کہ پچھلے سال چین وچ اک سہہ فریقی اجلاس وچ چین ولوں افغانستان نوں سی پیک وچ رلتی ہون دی دعوت دتی گئی سی۔ چین دے دارالحکومت بیجنگ وچ ہون والے پاکستان، افغانستان تے چین اُتے مشتمل پہلی سہ فریقی اجلاس مگروں میڈیا نال گل بات کردے ہوئے چینی وزیر خارجا وینگ پی نے آکھیا سی کہ اقتصادی راہداری منصوبے نال خطے وچ ترقی ہوئے گی۔
