پاک فوج دا اوہ ریٹائرڈ جنرل جو ایس ویلے داڑھی رکھ کے شام وچ لڑ رہیا اے

اسلام آباد(پاکستان پوائنٹ نیوز16۔مئی2018ء ) سابق صدر جنرل (ر) پرویز مشرف نے آکھیا اے کہ جنرل (ر) شاہد عزیز اک غیر متوازن بندے نیں۔ مینوں پتا اے کہ اوہ بطور میجر تے کرنل کیہ کُجھ کردے رہے، اوہ میرے رشتے دار نیں۔ اوہناں بارے کسے نوں پتا نہیں کہ اوہ اج کل کتھے نیں۔ کُجھ لوک آکھ رہے نیں کہ اوہ داڑھی رکھ کے شام چلے گئے تے اوتھے لڑدے ہوئے مرگئے۔ کارگل ایشو بارے نجی ٹی وی دے اینکر ولوں کیتے گئے سوال دے جواب اُتے پرویز مشرف نے آکھیا کہ شاہد عزیز دی کتاب نوں حوالے دے طور اُتے پیش نہ کرو، اوہ اک غیر متوازن بندے نیں۔ شاہد عزیز نہیں جاندے کہ آرمی سانوں رازداری سکھاؤندی اے۔ ایس طرحاں دے آپریشنز لئی ساری دنیا وچ ڈھنڈورا نہیں پِٹیا جاندا۔ پروگرام وچ پرویز مشرف دا کہنا سی کہ جے تُسیں کوئی کارگل ورگا آپریشن کرنا اے تے کیہ ڈھنڈورا پِٹ کے کرنا اے؟تاں جے بھارت وی اوتھے آ جائے تے اسیں آپریشن کر ای نہ سکیے۔ صرف اوہناں نوں دسیا جاندا اے جیہناں نوں دسنا ضروری ہوند ا اے۔ سول انتظامیہ دے علم وچ وی لیانا ضروری نہیں ہوندا پر اوس ویلے دے وزیر اعظم نواز شریف نوں آن بورڈ لیا گیا تے اوہ سارے معاملے توں جانو سن۔