اسلام آباد(پاکستان پوائنٹ نیوز16۔مئی2018ء ) سپریم کورٹ توں نااہلی مگروں مسلم لیگ (ن) تے شریف خاندان دیاں آپسی لڑائیاں تے اختلافات بارے بہت ساریاں خبراں آ ئیاں پر اوہناں نوں رد کیتا گیا۔ تفصیل مطابق سپریم کورٹ توں نااہلی تے پارٹی صدارت دا عہدہ کھوہے جان مگروں نواز شریف نے ملکی اداریاں نوں تنقید دا نشانہ بنان دی نویں حکمت عملی اپنائی۔ اپنے کئی بیاناں وچ اوہناں نے عدلیہ تے نیب نوں ڈاڈھی تنقید دا نشانہ بنایا تے آکھیا کہ نیب وچ جاری کیس ساڈے خلاف اک انتقامی کارروائی اے۔
ملکی اداریاں خلاف اپنائی گئی حکمت عملی اُتے ایہ سوال چُکیا گیا کہ کیہ شہباز شریف وی ایس معاملے اُتے اپنے بھرا نال نیں؟شہباز شریف نے کئی تھاواں اُتے اپنے وڈے بھرا نواز شریف دی حمایت کیتی پر کُجھ وسیلیاں مطابق نواز شریف دی ایس نویں پالیسی اُتے شہباز شریف دا وی اوہناں نال اختلاف اے پر اوہ وڈے بھرا دے احترام وچ نواز شریف نوں کُجھ نہیں آکھدے تے اوہناں دا ہر حکم مندے نیں۔
دوجے پاسے اج سویرے جدوں احتساب عدالت دے باہر اک پرچاکار نے سابق وزیر اعظم نواز شریف توں سوال کیتا کہ کیہ شہباز شریف وی تہاڈی ایس پالیسی اُتے تہاڈے نال نیں؟پرچا کار دا سوال سُن کے نواز شریف نے کوئی جواب نہ دتا تے چُپ کر کے اگانہ نکل گئے۔ پرچا کارنے احتساب عدالت دے باہر سوال دوہرایا تے مریم نواز نے اگانہ ودھ کے پرچاکار نوں جواب دیند ے ہوئے آکھیا کہ جی شہباز شریف نواز شریف نال نیں۔
