نوجوان عتیق دے والد نے کرنل جوزف نال صلح دیاں خبراں نوں رد کر دتا

نوجوان عتیق دے والد نے کرنل جوزف نال صلح دیاں خبراں نوں رد کر دتا

اسلام آباد(پاکستان پوائنٹ نیوز15۔مئی2018ء ) اسلام آ باد وچ امریکی سفارتکار دی گڈی نال ٹکر دے نتیجے وچ نوجوان دے ہلاک ہون دے معاملے اُتے نوجوان عتیق دے والد نے کرنل جوزف نال صلح دیاں خبراں نوں رد کر دتا۔ نوجوان عتیق دے والد ادریس بیگ دا کہنا اے کہ کرنل جوزف دے معاملے اُتے کوئی گل طے نہیں ہوئی۔ اوہناں نے آکھیا کہ ساڈی گل بات اپنی حکومت نال چل رہی اے۔

ادریس بیگ نے آکھیا کہ اسیں معاملا رب دی ذات اُتے چھڈ دتا اے۔ ددجے پاسے میڈیا وسیلیاں مطابق امریکا ولوں نوجوان عتیق دے وارثاں نوں 40لکھ رُپئے تے اک بال نوں امریکا وچ نوکری دین دی آفر کیتی گئی سی۔ امریکی سفارتخانے ولوں عتیق دے والد ادریس بیگ نوں ایہ آفر حادثے دے چوتھے دن ای کر دتی گئی سی۔ مرحوم دے والد نے پہلے ویت لین توں انکار کیتا سی۔

وسیلیاں نے دسیا کہ کئی چینلز راہیں عتیق دے والد نال صلح دی کوشش کیتی جا رہی اے۔ پولیس دا کہنا اے کہ حیرت انگیز طور اُتے سانوں ایس ڈیل بارے کُجھ پتا نہیں اے۔ انج لگ رہیا اے کہ سانوں وی ڈیل توں پوری طرحاں انجانو رکھیا گیا اے جدکہ عتیق دے والد نے کسے قسم دی ڈیل ہون دیاں خبراں نوں رد کیتا اے۔ چیتے رہوے کہ پچھلی رات امریکی سفارتکار کرنل جوزف امریکا چلا گیا۔ کرنل جوزف نور خان ائر بیس توں اُچیچے جہاز راہیں امریکا گیا۔ پچھلے مہینے 7اپریل نوں اسلام آباد وچ کرنل جوزف نے تھانا کوہسار دے علاقے وچ موٹر سائیکل سوار نوجوان عتیق نوں گڈی دی ٹکر مار کے ہلاک کر دتا سی۔