لاہور(پاکستان پوائنٹ نیوز۔22ستمبر 2016) مسلم لیگ (ق) دے سربراہ چودھری شجاعت حسین نال تحریک انصاف دے چیئرمین عمران خان نے ملاقات کیتی، ملاقات وچ رائے ونڈ مارچ تے ملک دی سیاسی صورتحال اُتے وچار وٹاندرا کیتا گیا۔ تفصیل دے مطابق جمعرات دے دیہاڑے مسلم لیگ (ق) دے سربراہ چودھری شجاعت حسین نے پاکستان تحریک انصا ف دے چیئرمین عمران خان نال ملاقات کیتی۔
وسیلیاں دے مطابق ملاقات دوران دوویں رہنماواں وچکار اک دوجے نال تعان جاری رکھن اُتے وچار وٹاندرا کیتا گیا۔ عمران خان نے چودھری شجاعت نوں یقین دوایا کہ ساڈا مارچ ریلی دی صورت وچ رائے ونڈ جاوے گا۔ اوہناں نے آکھیا کہ رائے ونڈ مارچ دا مقصد جاتی امراء دا گھیراؤ نہیں اے تے نہ ای نواز شریف دے گھر نوں گھیرنا اے۔ ایس موقعے اُتے مسلم لیگ (ق) دے سربراہ نے آکھیا کہ رائے ونڈمارچ لئی پارٹی نال مشورا کراں گے، جہدے بعد تہانوں ایس حوالے نال جواب دِتا جائے گا۔
چودھری شجاعت حسین نے عمران خان نوں مشورا دِتا کہ رائے ونڈ مارچ نوں پر امن رکھیا تے ایس گل نوں یقینی بنایا جائے کہ کوئی اسلحا لے کے نہ جائے۔ اوہناں نے آکھیا کہ حکومت خلاف سیاسی محاز وچ منافقاں دا سیاسی سہارا نہ لِتا جائے۔
