لاہور(پاکستان پوائنٹ نیوز21۔ستمبر2016ء) آن والے ورھے نہ علاج جوگ بیماری دا سامنا کرن والے اک بندے دا سِر بدل دِتا جائے گا۔تفصیل دے مطابق31 رھیاں دا والری سپریڈو نو اوہ پہلا بندا ہووے گا جہنوں کسے دوجے بندے دا سِر لایا جائے گا۔ جدکہ ایہ آپریشن اٹلی دے ڈاکٹر سرگیو کاناویرو اپنی ٹیم دے نال چین وچ کرن گے۔ والری نے دسیا کہ ایس آپریشن وچ میری زندگی نوں بہت خطرا اے پر میں اپنی زندگی نوں بہتر بنان تے ڈاکٹری تواریخ دے اہم ترین منصوبے دا حصہ بنن نوں تیار آں۔
والری دا کہنا اے کہ ہُن وی میری حالت خراب اے۔ میں اپنی ویکھ بھال نہیں کر سکدا، میں ٹُر پھر نہیں سکدا۔ ایس لئی میں چاہنا واں کہ میری زندگی بہتر ہووے تے میں دوجے لوکاں دی مدد دے بغیر زندگی لنگھا سکاں۔ڈاکٹراں دا کہنا اے کہ ایس آپریشن اُتے 10 ملین پاؤنڈ خرچا آئے گا۔ آپریشن 36 گھنٹیاں وچ مکمل ہووے گا تے ایہدے وچ ڈاکٹری عملے دے 150 بندے حصہ لین گے۔
ایس توں پہلے ماہرین نے نِکی کامیابی دے نال جنوراں وچ ایس طرحاں دے آپریشن کیتے نیں پر بندیاں اُتے ایس طرحاں دا ایہ پہلاتجربا ہووے گا۔ڈاکٹر سرگیو دا کہنا اے کہ آپریشن وچ شامل سارے ڈاکٹراں دی رائے دے مطابق آپریشن دی کامیابی دے 90 فیصد چانسز نیں ، جے آپریشن کامیاب ہویا تے والری اپنی آواز وچ بول سکے گا تے اک سال دے اندر اندر ٹُر پِھر وی سکے گا۔آپریشن وچ شامل چینی ڈاکٹر ژیاؤپنگ رین ڈاکٹر سرگیو دے نال 1000 چوہیاں دے سِر بدل چکے نیں پر ایہناں وچوں کوئی وی زندا نہ بچ سکیا۔
