لاہور(پاکستان پوائنٹ نیوز14۔اپریل2018ء) اک پاسے جتھے لاہور رجسٹری اندر ریلوے وچ 60ارب رُپئے دے کسارے (خسارے) بارے آپ نوٹس کیس دی سنوائی ہوئی ۔ اوتھے دوجے پاسے انکشاف ساہمنے آ یا اے کہ ریلوے دا سارا ریکارڈ ساڑن تے غائب کرن دا حکم جاری کر دتا گیا اے۔ نجی ٹی وی چینل دے پروگرام وچ گل بات کردے ہوئے سینئر پرچا کار چودھری غلام حسین نے آکھیا کہ ریلوے وچ جو ہویا اے اوہ سبھ ویکھ لین۔
پر میں ایس گل دی پکی اطلاع دے رہیا واں کہ ریلوے وچ حکم دے دتا گیا اے کہ ریلوے وچ جو گھپلا ہویا اے، جو لُٹ مار ہوئی اے، بھاویں اوہ زمیناں دا مسئلا اے یاں کُجھ وی اے، سارے ریکارڈ نوں ضائع کردیو، ساڑ دیو تے غائب کر دیو۔ جاری حکماں وچ آکھیا گیا اے کہ ریلوے دا کوئی ریکارڈ سپریم کورٹ تے نیب تیکر نہ اپڑے۔ ریلوے دا ایم ڈی رو رہیا اے کہ اسیں کیہ کرئیے۔ ایس طرحاں تے رسی ساڈے گلے وچ پے جائے گی۔ اوہناں نے آکھیا کہ میں اوہناں لوکاں نوں خبردار کر رہیا واں، جیہناں نوں ریلوے وچ ریکارڈ غائب تے ضائع کرن دا آکھیا گیا اے ۔اوہناں دا کہنا سی کہ ساری دنیا دیاں اکھاں ریلوے اُتے نیں۔
