اسلام آباد(پاکستان پوائنٹ نیوز16۔ستمبر2016ء) اسیں طاہر القادری دے ناں آں، اوہناں نوں انصاف نہیں ملیا، رائے ونڈ مارچ وچ ساریاں جماعتاں نوں دعوت دِتی اے، ایتوار نوں رائے ونڈ مارچ دی تاریخ دا اعلان کراں گے۔ تفصیل دے مطابق جمعے دے دیہاڑے بنی گالہ وچ میڈیا نال گل بات کردے ہوئے پاکستان تحریک انصاف دے چیئرمین عمران خان دا کہنا سی کہ تحریک انصاف سنے ہور سیاسی جماعتاں دے نمایندیاں نوں ایتوار نوں سَدیا اے تے ایتوار نوں ای رائے ونڈ جان دی تاریخ دا اعلان کراں گے۔
اوہناں دا کہنا سی کہ اسیں مَحرماں توں پہلے مارچ کرنا چاہندے آں۔ اوہناں نے آکھیا کہ سرعام 80 لوکاں نوں گولیاں ماریاں گئیاں انج تے آمریت وچ وی نہیں ہوندا، مشرف دی ڈکٹیٹر شپ تے نواز شریف دی جمہوریت وچ کیہ فرق اے۔ اینی بربادی تے مشرف دور وچ نہیں ہوئی۔ اوہناں نے آکھیا کہ مینوں کوئی انج دا ادارا دس دیو جو مشرف دے دور توں بہتر ہووے۔ اوہناں نے آکھیا کہ اپنا ضمیر نہ ویچن والیاں نوں سلام پیش کرنا واں۔
حکمران جماعت نوں تنقید دا نشانا بناندے ہوئے اوہناں نے آکھیا کہ اپنی کرپشن نوں لُکان لئی جمہوری ادارے خراب کیتے جا رہے نیں، اپنے مفاد دی خاطر جمہوری اداریاں تے پاکستان نوں تباہ کیتا جا رہیا اے۔ اوہناں نے آکھیا کہ رائے ونڈ مارچ دا مقصد پاناما لیکس اُتے رُکیاں ہوئیاں تحقیقات بارے جواب منگنا اے۔ عمران خان نے ہور آکھیا کہ میں کوئی سولو فلائٹ نہیں لئی ایہ صرف اک پروپیگنڈا اے۔
