عامر لیاقت دی پارٹی اندر مخالفت: عمران خان نے کارکناں نوں اک مہینے دا ویلا دے دتا

اسلام آباد(پاکستان پوائنٹ نیوز24۔مارچ2018ء) نجی ٹی وی چینل نوں انٹرویو دیندے ہوئے پی ٹی آئی چیئرمین عمران خان نے آکھیا کہ عامر لیاقت دی پارٹی وچ رلت مگروں کوئی وی پارٹی چھڈن نوں تیار نہیں اے، ایہ سبھ گلاں غلط نیں۔ سوشل میڈیا اک ہور شے اے، پارٹی دے سارے لوک آن بورڈ نیں تے ساریاں نے عامر لیاقت حسین نوں پارٹی وچ رلت اُتے جی آیاں آکھیا اے۔ عمران خان دا کہنا سی کہ عامر لیاقت اُتے کوئی کرپشن دا الزام نہیں اے، اسیں ایہو آکھدے آں کہ جے ملک نوں بہتر بنانا اے تے پہلے کرپشن ختم کرو۔ عامر لیاقت حسین آؤندے الیکشن وچ پارٹی دے امیدوار وی ہو سکدے نیں جے کوئی اوہناں نوں پارٹی لئی ٹھیک نہیں سمجھدا تے میں اوہناں نوں اک مہینہ دینا واں۔ میں دعوے نال آکھ سکنا واں کہ سبھ کارکن عامر لیاقت نال ٹُرن گے جدوں اوہناں نوں پتا لگے گا کہ کوئی اوہناں دی پارٹی لئی لڑ رہیا اے۔ عمران خان دا کہنا سی کہ جدوں فواد چودھری پارٹی وچ آئے تے اوہناں نوں وی ایسے طرحاں دی مزاحمت دا ساہمنا سی کیونکہ اوہناں نے وی پی ٹی آئی بارے سوشل میڈیا اُتے بہت کُجھ آکھیا سی پر ہن کارکن فواد چودھری نال سیلفیاں لیندے نیں۔