مشہور مذہبی رہنما نے ججاں نوں جادو توں بچن دا وظیفہ دس دتا

اسلام آباد(پاکستان پوائنٹ نیوز17۔مارچ2018ء) نجی ٹی وی چینل دے پروگرام وچ گل بات کردے ہوئے مشہور مذہبی رہنما مولانا طاہر اشرفی نے ججاں نوں جادو توں بچن دا وظیفہ دس دتا۔ مولانا طاہر اشرفی دا کہنا سی کہ ایہدے وچ کوئی شک نہیں اے کہ جادو برحق اے تے ایہ گل وی سچ اے کہ اللہ نے انسان نوں اشرف المخلوقات بنایا اے، کوئی جِنا وی کُجھ کر لئے، جے میرا تعلق میرے رب نال اے تے کسے داکوئی جادو نہیں چل سکدا۔ جتھوں تیکر عدلیہ تے انصاف دین والے اداریاں دا تعلق اے تے جتھوں جادوگراں نے جادو سِکھیا اے اوتھے رب نے اوہناں اداریاں دی راکھی دا وی نظام بنایا ہویا اے۔ جے اِنج جادو چلن لگ پین تے فیر بنگلا دیش دی پوری دنیا وچ حکومت ہو جانی چاہیدی سی۔ اوہناں نے آکھیا کہ تسبیح پڑھنا تے پھوکاں مارنا نواز شریف تے مریم نواز دا حق اے تاں جے اوہناں دے حق وچ نرم فیصلے ہون، ہن پتا نہیں اوہناں نوں ایہ تسبیح بنگال توں آئے ہوئے کسے جادو گر نے دسی اے یاں مولانا طارق جمیل نے، کیونکہ کُجھ دن پہلے مولانا طارق جمیل جدوں نواز شریف نوں ملن گئے تے خبر آئی سی کہ اوہناں نے کوئی وظیفہ دسیا اے۔ طاہر اشرفی دا کہنا سی کہ قرآن و حدیث مطابق وظائف کرنا ٹھیک اے پر ایس توں وکھ کوئی عمل شرک دے زمرے وچ آؤندا اے ۔ میں سمجھنا واں کہ خبر دی حد تیکر تے تبصرہ ہو سکداا ے۔اوہناں دا کہنا سی کہ کوئی شر تے شیطانی شے انسان اُتے حاوی نہیں ہو سکدی جے کسے انسان دا تعلق اللہ نال اے ۔ میں نہیں سمجھدا کہ کوئی جادوگر کسے عدالت یاں جج اُتے اثر انداز ہو سکدا اے کیونکہ عدل تے انصاف دے ایس نظام دی حفاظت رب آپ کردا اے۔ چیتے رہوے کہ پچھلے دیہاڑے خبر آئی سی کہ کیساں توں بچن لئی نواز شریف تے مریم نواز نے بنگالی جادوگراں توں ٹوٹکے سکھے نیں۔