لنڈی کوتل(پاکستان پوائنٹ نیوز17۔مارچ2018ء) آرمی چیف جنرل قمر جاوید باجوہ د اکہنا اے کہ اوہ وفاق دے آہر ہیٹھ چلن والے قبائلی علاقے (فاٹا) نوں خیبرپختونخوا نال جوڑن دے حامی نیں، پر خطے دی حیثیت دی تبدیلی سارے سٹیک ہولڈرز دے مشورے نال ہونی چاہیدی۔ فاٹا دی خیبرایجنسی توں تعلق رکھن و الے دو قبائلی رہنماواں نے نجی ٹی وی نال گل بات کردے ہوئے دسیا کہ آرمی چیف نے آکھیا کہ میں فاٹا توں تعلق رکھن والے اوہناں نوجواناں نال ملاقات کیتی جو فاٹا تے خیبرپختونخوا نوں جوڑنا چاہندے نیں ، جیہدے مگروں ذاتی طور اُتے ایہدی حمایت کرنا واں۔
جنرل قمر جاوید باجوہ دا کہنا اے کہ فاٹا تے خیبرپختونخوا نوں جوڑن دے حوالے نال کوئی وی فیصلا باہروں نہیں کیتا جائے گا بلکہ اوتھے رہن والے قبائلیاں دیاں جائز خاہشاں تے مطالبیاں نوں عزت بخشی جائے گی۔ آرمی چیف نے ہور آکھیا کہ چھیتی ای میں ایس فیصلے دے حامی تے مخالف قبائیلیاں وچکار ملاقاتاں کراواں گا ، جیہدے مگروں فاٹا دے چالو (موجودہ) نظام وچ خاہش مطابق تبدیلی دے حوالے نال فاٹا دی آؤندے ویلے وچ حیثیت اُتے اک سانجھ پیدا ہوئے گی۔
جنرل قمر جاوید باجوہ نے قبائلی عمائدین نوں آکھیا کہ کُجھ طاقتاں نوں پاکستان نوں غیر مستحکم کرن تے فاٹا اصلاحات وچ اوکڑاں پان لئی باہرلے ملک توں مالی مدد مل رہی اے۔ اوہناں نے دسیا کہ پاک فوج نے دہشت گرداں خلاف وڈیاں کامیابیاں حاصل کیتیاں تے اوہناں طاقتاں نوں بالکل نہیں چھڈیا جائے گا جو باہرلے ملک دی زمین ورتدے ہوئے پاکستان وچ دہشت گردی دیاں کارروائیاں کر رہیاں نیں۔
