لاہور(پاکستان پوائنٹ نیوز14۔مارچ2018ء) وزیر قانون پنجاب رانا ثناء اللہ دا کہنا اے کہ (ن) لیگی کارکن جُتی لے کے شیخ رشید نوں لبھ رہے نیں۔ تفصیل مطابق وزیر قانون پنجاب رانا ثناء اللہ نے جُتی کلچر شروع ہون دا ذمے وار عمران خان نوں قرار دے دتا۔ پنجاب اسمبلی دے باہر میڈیا نال گل بات کردے ہوئے رانا ثناء اللہ دا کہنا سی کہ پچھلے چار ورھیاں توں عمران خان اپنے مخالفاں خلاف غلط زبان ورتدے رہے نیں تے اوہناں دی وجہ توں سیاسی رہنماواں اُتے جُتی سُٹن دا کلچر شروع ہو رہیا اے۔
رانا ثناء اللہ دا کہنا سی کہ ہن ساڈے کارکن وی غصے وچ نظر آ رہے نیں تے اوہ پارٹی قیادت دے منع کرن مگروں وی نہیں رُکن گے۔ اوہناں دا کہنا سی کہ ہزاراں کارکن جُتی لئی شیخ رشید نوں لبھ رہے نیں، ایس لئی سبھ توں بُہتیاں جُتیاں شیخ رشید نوں پین گیاں۔
