جے عمران خان سیاست وچ نہ آؤندے تے؟

جے عمران خان سیاست وچ نہ آؤندے تے؟

لاہور(پاکستان پوائنٹ نیوز13۔مارچ2018ء) مرحوم حمید گل نے عمران خان نوں سیاست وچ لیا کے پاکستان دا وڈا نقصان کیتا۔ تفصیل مطابق مشہور کالم نگار امر جلیل نے اپنے کالم ’پیر سائیوں کی کرامات‘وچ لکھیا اے کہ میرا یقین اے کہ جے عمران خان نوں اپنے لئی مناسب آزادی دتی جاندی تے جنرل حمید گل اوہناں نوں گھسیٹ کے سیاست دے میدان وچ نہ لیاندے تے عمران خان اکلے کھیڈاں وچ پاکستان نوں ترقیاں دیاں انبراں اُتے لے جاندے۔

اوہ فلاحی کماں وچ سوشل ریفارمر بن کے ساہمنے آؤندے۔ امر جلیل نے لکھیا کہ مرحوم حمید گل نے ملک دا بہت وڈا نقصان کر دتا اے۔ عمران خان سیاست کرن لئی پیدا نہیں ہوئے سن۔ اوہ پیدائشی سپورٹس مین نیں۔ سپورٹ مین فیملی توں تعلق رکھدے نیں۔ اوہ اپنی زندگی دے 25توں 30سال سیاست دی بھینٹ چڑھان مگروں سیاستدان نہیں بن سکے۔ اوہ اپنی باڈی لینگوئج تے بول چال وچ اج وی پورے فاسٹ بالر وکھالی دیندے نیں۔ اوہناں دا اپنے کالم وچ کہنا اے کہ عمران خان نوں سیاست دی بھینٹ چڑھا نا مرحوم جنرل حمید گل دا سماجی جرم اے جیہدے لئی پاکستان دے آئین تے پینل کوڈ وچ کوئی سزا مختص نہیں اے۔