ریاض(پاکستان پوائنٹ نیوز12۔مارچ2018ء) سعودی عرب وچ اک نِکے بال نے ایمانداری دی وڈی مثال قائم کردے ہوئے15ہزار ریال واپس کر دتے۔ ’سبق‘ نیوز مطابق الباحہ کمشنری دے قصبے ذی عین وچ اک 12ورھیاں دا پڑھیار عمر محمد العمری گھر دا سامان لین بازار گیا تے سڑک اُتے اوہنوں اک لفافہ پیا ملیا۔عمر نے فطری تجسس دے تحت لفافہ چُکیا تے کھول کے ویکھیا تے اوہ نوٹاں نال بھریا ہویا سی۔
العمری اینے بُہتے نوٹ ویکھ کے گھبرا گیا، اوہ اوسے ویلے سِدھا گھر گیا تے اپنی ماں نوں ساری کہانی سُناندے نوٹاں دا لفافہ اوہدے حوالے کر دتا۔ عمر دی ماں نے آکھیاکہ اسیں کس طرحاں ایہ لفافہ اوس مالک تیکر اپڑا سکدے آں جدکہ سانوں تے پتا ای نہیں کہ ایہدا مالک کون اے۔ چیتے رہوے کہ ذکر کیتا گیا قصبہ واہی بیجی لئی مشہور اے لاگے دے شہراں توں تاجر ایس قصبے وچ آکے ایتھوں سبزیاں تے ہور شیواں لیندے نیں۔
العمری دی ماں نے آکھیا کہ قصبے دے بازار وچ جا تے جتھوں لفافہ ملیا اوتھے موجود لاگے دے دُکانداراں نوں دس کہ ایس لفافے دا امالک آئے تے اوہنوں ساڈے گھر گھل دیو۔ العمری نے اِنج ای کیتا ۔ دوجے پاسے اک بندہ العمری دے گھر اپڑ گیا جس نے لفافے دی نشانی دسی تے العمری نے اوہنوں لفافہ دے دتا۔ تاجر نے بال دی ایمانداری توں متاثر ہو کے اوہنوں 1000ریال انعام وچ دتے۔
