اسلام آباد(پاکستان پوائنٹ نیوز10۔ستمبر2016ء) تحریک انصاف دے وائس چیئرمین شاہ محمود قریشی نے آکھیا اے کہ پاناما لیکس اُتے حزب اختلاف دا موقف اک اے، ایس لئی ساریاں اپوزیشن جماعتاں نوں رائے ونڈ جلسے وچ رلت دی دعوت دے رہے آں۔ ہفتے دے دیہاڑے میڈیا نال گل بات کردے ہوئے شاہ محمود قریشی نے دسیا کہ رائے ونڈ جلسے لئی اعتزاز احسن نوں دعوت دے دِتی، دوبارہ وی پیپلز پارٹی نوں رلت دی درخاست کراں گے۔
اوہناں دا کہنا سی کہ تحریک انصاف نے پاناما لیکس اُتے سانجھا موقف رکھن والیاں اپوزیشن جماعتاں نوں رائے مارچ دی دعوت دِتی۔ اوہناں نے آکھیا کہ پاناما لیکس اُتے اسیں الیکشن کمیشن گئے تے پیپلز پارٹی نے وی کمیشن نال رابطا کیتا، سپریم کورٹ وچ درخاست دِتی تے جماعت اسلامی نے وی عدالت عظمی نال رابطا کیتا۔ شاہ محمود قریشی نے آکھیا کہ چودھری شجاعت حسین نے آکھیا کہ پنجاب وچ کسے دے گھر نوں گھیرن دی روایت نہیں تے اسیں اوہناں دے تحفظات اُتے نواز شریف دے گھر توں 5 کلو میٹر دور جلسے دی تھاں چُنی۔ اوہناں دا کہنا سی کہ صرف اپوزیشن دیاں دوجیاں جماعتاں دی وجہ توں اسیں رائے ونڈ جلسے دی تاریخ وی بدلی۔
